దిల్ రాజు కలవరం?

నిర్మాత దిల్ రాజు సదా చిద్విలాసంగా వుంటారు. కలవరం అన్నది తెలియదు. కానీ ఇప్పుడు కాస్త టెన్షన్ పడుతున్నారని గుసగుసలు వినిపిస్తున్నాయి. నాని హీరోగా ఆయన నిర్మించి ఎంసిఎ సినిమా గురించే ఈ కలవరం. ఆ సినిమాను పట్టుపట్టి ఈ నెల 21న విడుదలకు రెడీ చేస్తున్నారు. కానీ సినిమాకు రావాల్సినంత బజ్ రాలేదు. రావడం లేదు.

మరోపక్క దానికి పోటీగా వస్తున్న హల్లో సినిమా పబ్లిసిటీలో దూసుకుపోతోంది. నాగార్జున అన్నీ తానై ఆ సినిమాకు బజ్ తీసుకురావడానికి తెగ కష్టపడుతున్నారు. పైగా ఆడియో ఫరవాలేదు అనే టాక్ తెచ్చుకుంది. 

కానీ నాని నటించిన ఎంసిఎ ఆడియోకి అన్ని మార్కులు రాలేదు. పైగా ఈ సినిమాకు డైరక్టర్ వేణు శ్రీరామ్. ఆ పేరు కూడా అంత బజ్ వున్న పేరు కాదు. ఇక ఏం మోసినా, నాని, దిల్ రాజు ఇద్దరే మోయాలి. ఆడియో ఫంక్షన్ దగ్గరలో వుంది. సినిమా విడుదల కూడా ఇంక  రోజుల్లోకి వచ్చేసింది. ఈ లోగా ఓ పాటను రీప్లేస్ చేసి మాంచి మాస్ సాంగ్ ఏదైనా జోడించడానికి అవుతుందా? అనే డిస్కషన్ కూడా చేస్తున్నట్లు తెలుస్తోంది. ఈ మేరకు దేవీశ్రీప్రసాద్ తో దిల్ రాజు మాట్లాడినట్లు గుసగుసలు వినిపిస్తున్నాయి.

ఈ సినిమాకు భరోసా అంతా నాని మీదే. సినిమా ఆ మాత్రం, ఈమాత్రం వుంటే చాలు. నాని లాక్కుని వెళ్లిపోతాడన్నది ఓ లెక్క. కానీ ప్రతి సినిమాకు అలాగే అంటే అవుతుందా? అన్నది చూడాలి. నేను లోకల్ ను అలాగే లాక్కు వెళ్లాడు. మరి దీన్నేం చేస్తాడో చూడాలి.