రంగంలోకి భారతీయుడు… డేట్ ఫిక్స్

భారతీయుడు-2 ప్రమోషన్స్ కు రంగం సిద్ధమైంది. జూన్ 1 నుంచి ఈ సినిమా గ్రౌండ్ ఈవెంట్స్ ప్లాన్ చేశారు. జూన్ 1 న చెన్నైలో జరిగే ఆడియో ఫంక్షన్ నుంచి భారతీయుడు-2 యూనిట్ క్షేత్రస్థాయిలో ప్రచారానికి సిద్ధమౌతుంది.

నిజానికి ఈ సినిమా ప్రచారం ఆల్రెడీ మొదలైంది. తాజాగా జరిగిన ఐపీఎల్ మ్యాచులో హీరో కమల్ హాసన్, దర్శకుడు శంకర్ పాల్గొన్నారు. భారతీయుడు-2 విశేషాల్ని పంచుకున్నారు. అదే వేదికపై భారతీయుడు-3 పై కూడా శంకర్-కమల్ స్పందించిన సంగతి తెలిసిందే.

జూన్ 1 ఈవెంట్ తో ఈ సినిమా ప్రమోషన్స్ ను పూర్తిస్థాయిలో మొదలుపెట్టబోతున్నారు. జూన్ లోనే ఈ సినిమాను విడుదల చేయాలని అనుకున్నారు. అయితే పోస్ట్ ప్రొడక్షన్ ఇంకా పెండింగ్ ఉండడంతో పాటు, ప్రచారానికి తగినంత సమయం కావాలనే ఉద్దేశంతో సినిమాను జూలైకి వాయిదా వేశారు.

1996లో వచ్చిన భారతీయుడు సినిమాకు సీక్వెల్ గా వస్తోంది భారతీయుడు-2. ఈ సినిమా విడుదలైన 6 నెలల గ్యాప్ లో భారతీయుడు-3ని కూడా థియేటర్లలోకి తీసుకురాబోతున్నారు. అనిరుధ్ ఈ సినిమాకు సంగీతం అందిస్తున్నాడు.