నిజంగా అందుబాటు ధరలున్నాయా..?

“ప్రీమియర్ కు మాత్రమే 800 రూపాయలు పెంచాం. మరుసటి రోజు నుంచి అందరికీ అందుబాటు ధరల్లోనే ఉంది. రేట్లు బాగా పెరిగిపోయాయని అనుకోవద్దు. అలాంటి మాటలు నమ్మొద్దు. థియేటర్లకు వచ్చి ఎంజాయ్ చేయండి. ఇప్పటికే కొంత రేట్లు తగ్గించాం. త్వరలోనే మరింత రివ్యూ చేసుకొని మీకు అందుబాటు ధరల్లోనే టికెట్ రేట్లు ఉంచుతాం.”

మైత్రీ మూవీ మేకర్స్ నోటి నుంచి స్వయంగా వచ్చిన డైలాగ్ ఇది. పుష్ప-2 సినిమాకు సంబంధించి టికెట్ రేట్లు అందరికీ అందుబాటు ధరల్లో ఉన్నాయట. ఇవాళ్టి స్టేటస్ చూసుకుంటే, నైజాంలో మల్టీప్లెక్సుల్లో టికెట్ రేట్లు కనిష్టంగా 572 రూపాయల నుంచి గరిష్టంగా 630 రూపాయల రేట్ల మధ్య ఉన్నాయి. ఇవి అందుబాటు ధరలని అనుకోవాలా?

హైదరాబాద్ కాబట్టి రేట్లు ఆమాత్రం ఉంటాయని అనుకోవడానికి వీల్లేదు. నైజాంలోని మిగతా పట్టణాలతో పాటు.. ఏపీలోని చాలా చోట్ల టికెట్ రేట్లు 40శాతం అధికంగానే ఉన్నాయి. మరి దీనికి నిర్మాతలు ఏం సమాధానం చెబుతారు. ఇప్పటికే కొన్ని చోట్ల రేట్లు తగ్గించాం అనేది మరో మాట. ఎక్కడెక్కడ అలా రేట్లు తగ్గించారో కూడా చెబితే బాగుండేది.

పుష్ప-2 సినిమా టికెట్ రేట్లు ఎక్కువగా ఉన్నాయనేది నిజం. అందుకే రెండో రోజు నుంచి ఆక్యుపెన్సీ తగ్గిందనేది అంతకంటే పచ్చి నిజం. నిర్మాతలు అంగీకరించకపోయినా, క్షేత్రస్థాయిలో ఉన్న ఈ టాక్ ను ఎవ్వరూ తోసిపుచ్చలేరు. బన్నీ అంటే ఇష్టం, సినిమాపై క్రేజ్ ఉన్నప్పటికీ కుటుంబ ప్రేక్షకులు ఇంకా గడప దాటి థియేటర్లకు రాలేదంటే దీనికి కారణం కూడా ఇదే.

ఇప్పటికైనా ఇలాంటి స్టేట్ మెంట్స్ ఆపేయాలి. బుక్ మై షో ఓపెన్ చేస్తే కళ్లముందు టికెట్ రేట్లు కనిపిస్తుంటే, ఇంకా ఈ బుకాయింపులు ఎందుకు? రేపట్నుంచి వద్దన్నా సినిమాకు ఆక్యుపెన్సీ తగ్గుతుంది. కాబట్టి ఆ ‘రివ్యూ’ ఏదో తొందరగా చేసుకొని సోమవారం నుంచి టికెట్ రేట్లు తగ్గిస్తే అందరికీ మంచిది.