Epaper
హీరోయిన్ అనన్య పాండే ఇంట్లో ఎన్సీబీ అధికారులు దాడులు చేశారు. కొద్దిసేపటి కిందట ముంబయిలోని అనన్య పాండే నివాసంలో ఈ దాడులు జరిగాయి. అధికారులు సోదాలు నిర్వహించే సమయంలో అనన్య పాండే, ఆమె తండ్రి సీనియర్ నటుడు చుంకీ పాండే ఇంట్లోనే ఉన్నారు. ఓ గంట పాటు సోదాలు నిర్వహించిన అధికారులు, ఆ వెంటనే అనన్య పాండేకు సమన్లు జారీ చేశారు. వెంటనే విచారణకు హాజరవ్వాల్సిందిగా ఆదేశించారు.
ఇలా దాడులు చేసి, ఆ వెంటనే విచారణకు రమ్మని చెప్పడంతో అనుమానాలు ఎక్కువయ్యాయి. అనన్య పాండే నివాసంలో ఏమైనా మాదక ద్రవ్యాలు దొరికాయా అనే విషయంపై అధికారులు స్పష్టత ఇవ్వలేదు. ఓ వర్థమాన బాలీవుడ్ నటితో, షారూక్ కొడుకు ఆర్యన్ ఖాన్ డ్రగ్స్ ఛాట్ చేశాడంటూ వార్తలు వచ్చిన 24 గంటల వ్యవథిలోనే అనన్య పాండే నివాసంలో సోదాలు జరగడం పలు అనుమానాలకు తావిస్తోంది.
అనన్య పాండేను కేవలం విచారణకు మాత్రమే పిలిచామని, పలు ప్రశ్నలు అడిగి వివరణ తీసుకున్న తర్వాత పంపించేస్తామని అన్నారు అధికారులు. డ్రగ్స్ కు, అనన్యకు సంబంధం ఉందా లేదా అనే విషయాన్ని అప్పుడే నిర్థారించలేమని తెలిపారు.
ఓవైపు అనన్య పాండే నివాసంలో సోదాలు జరుగుతున్న టైమ్ లోనే, ఎన్సీబీ నుంచి మరో టీమ్ షారూక్ ఖాన్ నివాసంలో సోదాలు జరిపింది. ఈరోజు షారూక్ ఖాన్, తొలిసారి ముంబయిలోని అర్థర్ రోడ్ జైలులో ఉన్న తన కొడుకు ఆర్యన్ ను కలిశాడు. ఈ భేటీ జరిగిన వెంటనే షారూక్ నివాసంలో సోదాలు జరిపారు ఎన్సీబీ అధికారులు.
ఆర్యన్ ఖాన్ కు ముంబయి సెషన్స్ కోర్టు మరోసారి బెయిల్ నిరాకరించిన విషయం తెలిసిందే. ఆఖరి నిమిషంలో ఎన్సీబీ అధికారులు కీలకమైన ఆర్యన్ ఖాన్ వాట్సాప్ ఛాటింగ్స్ ను కోర్టుకు సమర్పించడంతో ఆర్యన్ కు బెయిల్ దొరకలేదు. ఇప్పుడా ఛాటింగ్స్ ఆధారంగానే అనన్య పాండే నివాసంలో సోదాలు జరిగినట్టు చెప్పుకుంటున్నారు. అనన్య, ఆర్యన్ దాదాపు రెండేళ్లుగా స్నేహితులు.