Epaper
నారా రోహిత్, సోనాక్షి సిన్హా.. ఇప్పుడు హిట్టు కొట్టేది ఎవరు? వీళ్లిద్దరూ విజయాన్ని సొంతం చేసుకుంటారా? వీళ్లిద్దరి మధ్య పోలిక ఏంటంటారా? ఒకే సినిమాను వీళ్లిద్దరూ రీమేక్ చేశారు, దాదాపు ఒకేసమయంలో ఆ సినిమాలు విడుదల కాబోతున్నాయి. మరి వీళ్లిద్దరిలో హిట్టు కొట్టేది ఎవరు? అనేది ఆసక్తికరమైన అంశమే కదా!
నాలుగేళ్ల కిందట విడుదలై, తమిళనాట విజయవంతం అయిన సినిమా ‘మౌనగురు’. శాంతకుమార్ దర్శకత్వంలో అరుల్ నిధి, ఇనియాలు ముఖ్య పాత్రల్లో నటించగా రూపొందిన ఈ సినిమా హిట్టు కావడంతో దీన్ని తెలుగులో నారా రోహిత్ రీమేక్ చేశాడు. ‘శంకర’ పేరుతో రూపొందిన ఈ సినిమా ఇప్పటికే ఎప్పుడో విడుదల కావాల్సిన వాయిదాలతో ముందుకు వెళుతోంది.
ప్రస్తుతానికి అయితే వచ్చే నెలలో ఈ సినిమా విడుదల కానుందని సమాచారం. ఇక ఇదే సినిమాను హిందీలో సోనాక్షి సిన్హా ప్రధాన పాత్రలో నటించగా రూపొందింది. తెలుగు, తమిళ వెర్షన్లలో హీరో పాత్రధారి ప్లేసులో హీరోయిన్ ను పెట్టి హిందీలో ‘అఖీరా’ పేరుతో ఈ సినిమాను రూపొందించారు. హీరో పాత్ర చుట్టూ తిరిగే ఈ కథను హీరోయిన్ ఓరియెంటెడ్ గా మార్చారు. మగ పాత్రను ఆడగా మార్చి ఈ సినిమాను హిందీలో రూపొందించాడు మురగదాస్.
విశేషం ఏమిటంటే.. హిందీలో కూడా ఈ సినిమా వాయిదాల మీదే నడుస్తోంది. ఎట్టకేలకూ ఇటీవలే షూటింగు పూర్తి చేసుకుని.. వచ్చే నెలలో విడుదలకు డేట్ ను ఫిక్స్ చేసుకుంది ఈ సినిమా. ఈ విధంగా తమిళ ‘మౌనగురు’ హిందీ, తెలుగు వెర్షన్లు దాదాపుగా ఒకే సమయంలో విడుదల కాబోతున్నాయి. మరి ఈ రెండింటిలో ఏది విజయవంతం అవుతుందో.. తమిళ సబ్జెక్టు సత్తాను చాటుతూ రెండూ భాషల్లోనూ విజయవంతం అవుతుందో చూడాలి!