గాయం కెలకడం తప్ప ఆర్జీవీ సాధించేది ఏమిటి?

రియల్ సంఘటనల ఆధారంగా సినిమాలు తీయడం ఒక్కోసారి ఇబ్బందిగా మారుతుంది. ముంబాయిపై దాడి లాంటి సంఘనటలు ఆధారంగా సినిమా తీస్తే చూడాలవనే ఆసక్తి వుంటుంది. కానీ నలుగురు కిరాతకులు ఓ అమ్మాయిని దారుణంగా అత్యాచారం చేసి, కాల్చి చంపిన సంఘటనను మళ్లీ సినిమాగా తీసి, కళ్ల ముందుకు తెస్తే, చూడడానికే భయంగా వుంటుంది. ఆందోళనగా వుంటుంది. బాధగా వుంటుంది. ఆ సంఘటన కారణంగా అనంత విషాదానికి గురైన కుటుంబానికి మరింత బాధగా మారుతుంది.

ఆర్జీవీ ఇప్పుడు చేస్తున్న పని ఇదే. హైదరాబాద్ నగర శివార్లలో జరిగిన సంఘటన ఆధారంగా దిశ అనే సినిమాను రూపొందించారు. ఈ సినిమా ట్రయిలర్ ను వదిలారు. చూడ్డానికే ఇబ్బంది పడేలా, బాధపడేలా వుంది. ఇక నిజమైన దిశ ఇంటి సభ్యులు ఈ ట్రయిలర్ చూస్తే గుండె ముక్కలయ్యేలా బాధపడరా?

ఇలాంటి సినిమా తీసి ఆర్జీవీ సాధించేది ఏమిటి? నాలుగు డబ్బులా? సామాజిక బాధ్యత వుండక్కరలేదు. కనీసం మానవతా విలువలైనా వుండాలి కదా? మన చర్యలతో ఆ కుటుంబాన్ని మరింత బాధపెట్టకూడదు అనే ఇంగిత జ్ఞానం అయినా వుండాలి కదా. అయినా ఇలాంటి సుద్దులు అన్నీ ఆర్జీవీ చెవికి ఎక్కేవి కావు. ఎవరు ఏమనుకుంటేనేం, ఎలా అనుకుంటేనేం, నాలుగు డబ్బులు సంపాదించామా? లేదా? అంతే కదా? ఆయన ఆలోచన.