మరో క్రికెట్ బయోపిక్!

ఇప్పటికే మహేంద్ర సింగ్ ధోనీ బయోపిక్ వచ్చింది. సచిన్ టెండూల్కర్ కు సంబంధించి బయోపిక్ లాంటిదే ఒకటి వచ్చింది. అది డాక్యుమెంటరీ తరహాలో రూపొందింది. ఇక ప్రస్తుతం మేకింగ్ దశలో 1983 ఉంది. ఆ సంవత్సరంలో జరిగిన క్రికెట్ ప్రపంచకప్ లో కపిల్ డెవిల్స్ ఘన విజయం గురించి ఆ సినిమా రూపొందుతూ ఉంది. అందులో రణ్ వీర్ సింగ్ కపిల్ దేవ్ గా కనిపిస్తూ ఉన్నాడు.

ఇంకా అనేక మంది ప్రముఖ నటీనటులు ఆ సినిమాలో నటిస్తూ ఉన్నారు. ఆ సంగతలా ఉంటే.. మరో క్రికెట్ బయోపిక్ ప్రకటన వచ్చింది. ఇది ఉమెన్ క్రికెటర్ బయోపిక్. భారత క్రికెట్ జట్టుకు చాలా కాలంగా సేవలందిస్తున్న మిథాలీ రాజ్ బయోపిక్ ఇది. ఫిమేల్ క్రికెట్ లో అనితర సాధ్యమైన రికార్డులను సాధించింది మిథాలీ. 

ఈ క్రమంలో ఆమె బయోపిక్ రూపొందుతూ ఉంది. మిథాలీ పాత్రలో తాప్సీ పన్ను నటిస్తూ ఉంది. ఈ మేరకు అధికారికంగా ప్రకటన వచ్చింది కూడా. తన సోషల్ మీడియా ఖాతాలో తాప్సీ ఈ విషయాన్ని పోస్టు చేసింది. విమెన్ సెంట్రిక్ ఆ వరసగా నటిస్తూ ఉంది తాప్సీ. ఈ క్రమంలో మిథాలీ బయోపిక్ కూడా ఆమెకే దక్కినట్టుగా ఉంది. ఇక సానియా, సైనా తదితరుల బయోపిక్స్ కూడా తెరకెక్కడానికి క్యూలో ఉన్న విషయం తెలిసిందే.