Epaper
విజయ్ దేవరకొండ ఒకేసారి 2 సినిమాలకు గ్రీన్ సిగ్నల్ ఇచ్చిన సంగతి తెలిసిందే. ఈ రెండు సినిమాలు 2 ప్రాంతాల నేపథ్యంలో సాగబోతున్నాయి. ఒకటి గోదారి నేపథ్యంలో, ఇంకోటి రాయలసీమ బ్యాక్ డ్రాప్ లో రాబోతున్నాయి. ఈ విషయాన్ని మేకర్స్ చెప్పలేదు. ఆ సినిమాల కాస్టింగ్ కాల్స్ చెబుతున్నాయి.
కొన్ని రోజుల కింద దిల్ రాజు కాస్టింగ్ కాల్ కు పిలుపునిచ్చాడు. విజయ్ దేవరకొండ సినిమాలో నటించడానికి ఆసక్తి ఉన్నవాళ్లు ముందుకురావాలనేది దాని సారాంశం. అయితే గోదారి యాస వచ్చేవాళ్లకు ఎక్కువ ప్రాధాన్యం అనే విషయాన్ని అందులో చెప్పకనే చెప్పారు. అలా రవికిరణ్ కోలా సినిమా గోదావరి బ్యాక్ డ్రాప్ తో రాబోతోందనే విషయం బయటకొచ్చింది.
ఇక మైత్రీ మూవీ మేకర్స్ బ్యానర్ పై సినిమాకు ఓకే చెప్పాడు విజయ్ దేవరకొండ. రాహుల్ సంకృత్యాన్ దర్శకత్వంలో రాబోతున్న ఈ సినిమాకు రాయలసీమను నేపథ్యంగా తీసుకున్నారు. ఈ విషయం కూడా కాస్టింగ్ కాల్ ద్వారానే తెలిసింది.
విజయ్ దేవరకొండ, రాహుల్ సంకృత్యాన్ సినిమా మొత్తం సీమలోనే ఉంటుందని మేకర్స్ స్పష్టం చేశారు. ఈ మేరకు కర్నూలు, కడప, తిరుపతి, అనంతపురంలో ఆడిషన్స్ నిర్వహించబోతున్నారు. వచ్చేనెల 1 నుంచి 9వ తేదీ వరకు ఇవి జరుగుతాయి.
తెలంగాణ యాసలో విజయ్ దేవరకొండ చాలా బాగా డైలాగ్స్ చెబుతాడు. అయినప్పటికీ గతంలో వచ్చిన గీతగోవిందం, తాజాగా వచ్చిన ఫ్యామిలీ స్టార్ లో ఆంధ్రా స్టయిల్ లో డైలాగ్స్ చెప్పాడు. త్వరలోనే రాబోతున్న ఈ 2 సినిమాల్లో అతడు గోదారి యాస, సీమ యాసలో మాట్లాడబోతున్నాడు.