ఎంత చావగొట్టినా స్టీల్ ప్లాంట్ పైకి లేస్తోంది!

దాని పేరే ఉక్కు. దాని వెనక ఉక్కు సంకల్పం ఉంది. ఎందరో అమరుల త్యాగాలు ఉన్నాయి. అలాగే ఉదారంగా భూములు ఇచ్చిన వారి మంచితనం ఉంది. అందుకే ప్లాంట్ ని ప్రైవేటైజేషన్ ఎంతలా దిగమింగాలని చూసినా మూడేళ్ళుగా అది సాగడం లేదు. విశాఖ స్టీల్ ప్లాంట్ కి ఊపిరి పోసింది నిధులు ఇచ్చి ఆదుకున్నది అంతా కాంగ్రెస్ ప్రభుత్వాలే.

ఇప్పటికి యాభై ఏళ్ళ క్రితం ఇందిరాగాంధీ విశాఖ స్టీల్ ప్లాంట్ ని ఏర్పాటు చేస్తున్నట్లుగా పార్లమెంట్ లో ప్రకటించారు. ఆ తరువాత ఆమె స్వయంగా విశాఖ వచ్చి శంకుస్థాపన చేశారు. ఆమె మూడోసారి ప్రధాని అయినపుడు నిర్మాణ పనులు ప్రారంభం అయ్యాయి. మరో కాంగ్రెస్ ప్రధాని పీవీ నరసింహారావు ప్రధానిగా ఉన్నపుడు విశాఖ ఉక్కు ఉత్పత్తిని ప్రారంభించింది.

విశాఖ స్టీల్ ప్లాంట్ దేశంలోనే చాలా పేరు గడించింది. నాణ్యమైన స్టీల్ తయారీలో అంతర్జాతీయంగా పేరు ఉంది. అయితే సొంత గనులు లేకపోవడం పాలకుల ఉదాశీనత కారణంగానే ప్లాంట్ తిప్పలు పడుతోంది. గత మూడేళ్ళుగా ప్లాంట్ ప్రైవేటైజేషన్ అనే వధ్య శిల మీద నిలబడి ఉన్నా సమయం వచ్చినపుడల్లా తన సత్తాను చాటుకుంటోంది.

లేటెస్ట్ గా చూస్తే ప్లాంట్ ఉత్పత్తిలో మరో రికార్డు సాధించి కేంద్ర పాలకుల ప్రైవేటీకరణ విధానాలు తప్పు అని చాటి చెప్పింది. వంద మిలియన్ టన్నులను ఉత్పత్తి చేయడం ద్వారా స్టీల్ ప్లాంట్ పాత రికార్డులు బద్ధలు కొట్టి కొత్త రికార్డులు నెలకొల్పింది. కేవలం రెండు బ్లాక్ ఫర్నేస్ లతోనే ప్లాంట్ ఈ రికార్డుని సాధించింది.

ఇది ఒక శాంపిల్ మాత్రమే అని స్టీల్ ప్లాంట్ ఈ ఆర్ధిక సంవత్సరం ముగిసేలోగా 300 మిలియన్ టన్నుల ఉత్పత్తి సాధించడానికి కూడా టార్గెట్ పెట్టుకుంది అని అంటున్నారు. ఆ విధంగా కేంద్ర పాలకుల ఆలోచనలు తప్పు అని ప్లాంట్ తన ఉత్పత్తులతో బెంచ్ మార్క్ ని కొత్తగా క్రియేట్ చేస్తూ ముందుకు సాగుతోంది అని అంటున్నారు. వీలైతే 7.2 మిలియన్ టన్నులను ఉత్పత్తి చేయడానికి కూడా ప్లాంట్ రెడీగా ఉందని అంటున్నారు. ఈ రికార్డులు చూసి అయినా కేంద్ర ప్రభుత్వం మనసు మార్చుకుంటుందా అని కార్మిల లోకం ఆశగా ఎదురుచూస్తోంది.