Epaper
మూవీ ఆర్టిస్ట్స్‌ అసోసియేషన్‌ ‘మా’ ఎన్నిక‌ల్లో ప్ర‌త్య‌ర్థి మంచు విష్ణు ప్యాన‌ల్‌ను ప్రకాశ్రాజ్ రెచ్చ‌గొడుతున్నారా? అంటే …ఔన‌నే స‌మాధానం వ‌స్తోంది. మొన్న మంచు విష్ణుపై ప్రకాశ్రాజ్ నేరుగా మాట‌ల దాడి చేసిన సంగ‌తి తెలిసిందే.
ప‌వ‌న్‌క‌ల్యాణ్ మార్నింగ్ షో క‌లెక్ష‌న్ అంత కూడా …మీ (మంచు విష్ణు) సినిమా బ‌డ్జెట్ వుండ‌ద‌నే ప్రకాశ్రాజ్ సీరియ‌స్ కామెంట్స్ చేశారు. ఈ కామెంట్‌పై ఇంత వ‌ర‌కూ మంచు విష్ణు వైపు నుంచి కౌంట‌ర్ రాక‌పోవ‌డం ఆశ్చ‌ర్యం క‌లిగిస్తోంది.
ఒక‌వైపు ఆ అంశంపై చ‌ర్చ జ‌రుగుతుండ‌గానే, మ‌రోసారి ప్రకాశ్రాజ్ రెచ్చిపోయారు. నరేశ్ అహంకారి అని, ఒళ్లు ద‌గ్గ‌ర పెట్టుకుని మాట్లాడాల‌ని ప్రకాశ్రాజ్ గ‌ట్టి హెచ్చ‌రిక చేయ‌డం సంచ‌ల‌నం రేకెత్తిస్తోంది. ఈ నెల 10న మూవీ ఆర్టిస్ట్స్‌ అసోసియేషన్‌ ‘మా’ ఎన్నిక‌లు జ‌ర‌గ‌నున్న సంగ‌తి తెలిసిందే. ఇందులో భాగంగా ప్రకాశ్రాజ్ ప్ర‌చార వేగం పెంచారు.
ఇందులో భాగంగా అసోసియేషన్‌ సభ్యులతో తాజాగా నిర్వహించిన ఓ కార్యక్రమంలో ప్ర‌త్య‌ర్థుల‌పై ప్రకాశ్రాజ్ త‌న మార్క్ పంచ్‌ల‌తో విరుచుకుప‌డ్డారు. మూవీ ఆర్టిస్ట్స్‌ అసోసియేషన్‌ ‘మా’ సిగ్గుపడేలా నటుడు నరేశ్ ప్రవర్తిస్తున్నారని ప్రకాశ్రాజ్ ఆరోపించారు.
త‌న‌ను స్థానికేత‌రుడని, తెలుగువాడు కాదంటూ నరేశ్ చేసిన వ్యాఖ్యలపై ప్రకాశ్రాజ్ మండిపడ్డారు. తాను తెలుగు మాట్లాడినంతగా మంచు విష్ణు ప్యానల్‌లో ఎవరూ మాట్లాడలేరన్నారు. త‌న‌ను పెంచింది తెలుగు భాష అని చెప్పుకొచ్చారు.
తాను ఒక ఉత్తరం రాస్తే ‘మా’ అసోసియేషన్‌కే తాళం పడేద‌న్నారు. సౌమ్యంగానే కాదు కోపంగా మాట్లాడడం కూడా తెలుసని ప్రకాశ్రాజ్ హెచ్చ‌రించారు. సినిమా ఎన్నికల్లోకి వైఎస్ జగన్, కేసీఆర్, బీజేపీల‌ను లాగ‌డంపై ఆయ‌న ఆగ్ర‌హం వ్య‌క్తం చేశారు. ఓట్ల సునామీలో మంచు విష్ణు ప్యానల్‌ కొట్టుకుపోతుంద‌ని ప్రకాశ్‌ రాజ్ జోష్యం చెప్పారు.