ఈ వీకెండ్ ఏకంగా 9 సినిమాలు

సెకెండ్ వేవ్ తర్వాత థియేటర్లు తెరుచుకున్న మొదటివారం 5 సినిమాలు రిలీజయ్యాయి. గత వారం థియేటర్లలోకి 6 సినిమాలొచ్చాయి. ఇక ఈ వారాంతం ఏకంగా 9 సినిమాలు విడుదలకు సిద్ధమయ్యాయి. కాకపోతే అన్నీ చిన్న సినిమాలే.

ఈ వారం కొన్ని సినిమాలు శుక్రవారం రిలీజ్ అవుతుంటే, మరికొన్ని సినిమాలు శనివారంకు షెడ్యూల్ అయ్యాయి. శుక్రవారం 7 సినిమాలు థియేటర్లలోకి వస్తున్నాయి. వీటిలో పూర్ణ నటించిన సుందరి సినిమా ఒకటి. పెళ్లయిన ఓ మహిళ, ఇతర మగాళ్ల నుంచి తప్పించుకునేందుకు తన జీవితానికి సంబంధించి ఎలాంటి కీలక నిర్ణయం తీసుకుందనే కాన్సెప్ట్ తో ఈ సినిమా తెరకెక్కింది. సినిమా అక్కడక్కడ బోల్డ్ గా కూడా ఉంటుందట.

ఈ సినిమాతో పాటు బ్రాందీ డైరీస్, సలామ్ నమస్తే, చైతన్య, రావే నా చెలియా సినిమాలు కూడా రిలీజ్ అవుతున్నాయి. లిస్ట్ లో డబ్బింగ్ సినిమాలు కూడా ఉన్నాయి. సిద్దార్థ్, జీవీ ప్రకాష్ నటించిన ఒరేయ్ బామ్మర్ది సినిమాతో పాటు ది కంజూరింగ్-3 కూడా రేపు థియేటర్లలోకి వస్తోంది.

ఇక శనివారం విశ్వక్ సేన్ హీరోగా నటించిన పాగల్ సినిమా థియేటర్లలోకి వస్తోంది. ఈ వీకెండ్ ఓ మోస్తరు అంచనాలతో వస్తున్న సినిమా ఇదే. మూవీకి గట్టిగా ప్రమోషన్ చేశారు. భూమిక ఓ కీలక పాత్ర పోషించిందనే విషయాన్ని కూడా తాజాగా రివీల్ చేశారు. 

ప్రేక్షకులు ఇప్పుడిప్పుడే థియేటర్లలోకి వస్తున్న వేళ.. ఏమాత్రం వాళ్లను కూర్చోబెట్టగలిగినా పాగల్ సినిమాకు సక్సెస్ అయ్యే అవకాశాలు పుష్కలంగా ఉన్నాయి. అటు ఆర్.నారాయణమూర్తి తీసిన రైతన్న సినిమా కూడా శనివారమే థియేటర్లలోకి వస్తోంది.