Epaper
ఇప్పటికి రెండేళ్ల నుంచి ‘క్వీన్’ రీమేక్ గురించి రకరకాల వార్తలు వినిపిస్తూనే ఉన్నాయి. ఒకనాటి విలన్ త్యాగరాజన్ ఈ సినిమాను దక్షిణాదిన రీమేక్ చేయనున్నాడని అన్నారు. ఈ విషయాన్ని ఆయన కూడా పలు మార్లు ప్రకటించాడు. అదిగో.. ఇదిగో.. అన్నారు.. కానీ, సినిమా పట్టాలెక్కలేదు.
కేవలం ‘క్వీన్’ మాత్రమే కాదు.. సూపర్ హిందీ థ్రిల్లింగ్ ఎంటర్ టైనర్ ‘స్పెషల్ చబ్భీస్’ ను కూడా త్యాగరాజన్ రీమేక్ చేస్తాడనే మాట వినిపించింది. క్వీన్, స్పెషల్ చబ్బీస్ లను అతడు కేవలం తమిళంలోనే గాక.. తెలుగు, కన్నడల్లో కూడా తీస్తాడనే ప్రచారం జరుగుతోంది. ఈ రీమేక్ ల విషయంలో దక్షిణాది స్టార్ల పేర్లు వినిపించాయి. రెండేళ్ల నుంచి వినిపిస్తూనే ఉన్నాయి!
ఇక తాజాగా మీడియా ముందుకు వచ్చి బోలెడన్ని కబుర్లు చెప్పి వెళ్లాడు త్యాగరాజన్. క్వీన్ ను నాలుగు భాషల్లో తీస్తానని.. ఒక్కో భాషలో ఒక్కో దర్శకుడు అని అన్నాడు. కన్నడలో ప్రకాష్ రాజ్, మలయాళం- తమిళ వెర్షన్లకు రేవతి, తెలుగుకు మరో దర్శకుడు.. అంటూ ప్రకటన వచ్చింది. అలాగే ‘క్వీన్’ పాత్రకు కూడా ఒక్కో భాషలో ఒక్కో ప్రధాన పాత్రధారి ఉంటుందట. తమిళానికి తమన్నా, మలయాలానికి అమలపాల్.. తెలుగుకు మరో హీరోయిన్.. చేసేది రీమేక్ బొమ్మ దానికి ఒక్కో దర్శకుడు, ఒక్కో స్టార్ హీరోయిన్.. వినడానికి అయితే భలే ఉంది!
ఇక ఇప్పుడు విశేషం ఏమింటంటే.. ఈ సినిమా దర్శకుల జాబితాలోకి సుహాసిని కూడా వచ్చి చేరింది. తెలుగు వెర్షన్ కు ఆమె దర్శకత్వం వహిస్తుందట! ప్రకాష్ రాజ్ ,రేవతి, సుహాసినీ.. ఒక్కో వెర్షన్ ను ఒక్కోరు చెక్కుతారా! ఇంతజేసీ ప్రాజెక్టు ప్రారంభమయ్యేది ఇప్పుడే కాదు.. ఫిబ్రవరి అట! రెండేళ్ల నుంచి ప్రతిపాదనలోనే ఉండిపోయిన సినిమా.. రాబోయే రెండు నెలల్లో ఒక కొలిక్కి వస్తుందా?