సల్మాన్‌ఖాన్‌ కూడా వాడేస్తాడా.?

తమిళ సూపర్‌ స్టార్‌ రజనీకాంత్‌కి తమిళంలోనే కాకుండా, తెలుగుతోపాటు హిందీలోనూ బోల్డంత పాపులారిటీ వుంది. అందుకే, రజనీకాంత్‌ నుంచి ఏ సినిమా వచ్చినా, దేశంలోని చాలా భాషల్లో విడుదలవుతుంది. కొన్ని విదేశీ భాషల్లోకీ డబ్‌ చేసి, ఒకేసారి రజనీకాంత్‌ సినిమాని విడుదల చేస్తుంటారు. ఆయనకున్న క్రేజ్‌ అలాంటిది. 

సరిగ్గా ఈ క్రేజ్‌నే వాడేసుకున్నాడు షారుక్‌ఖాన్‌, తన 'చెన్నయ్‌ ఎక్స్‌ప్రెస్‌' సినిమా కోసం. 'లుంగీ డాన్స్‌..' అంటూ రజనీకాంత్‌ని షారుక్‌ఖాన్‌ ఏ రేంజ్‌లో వాడేసుకున్నాడో ప్రత్యేకంగా చెప్పాల్సిన పనిలేదు కదా.! ఇప్పుడు అదే రూట్‌లో సల్మాన్‌ఖాన్‌ పయనిస్తున్నాడని బాలీవుడ్‌ సినీ జనం చెవులు కొరుక్కుంటున్నారు. ప్రస్తుతం సల్మాన్‌ఖాన్‌ 'ట్యూబ్‌లైట్‌' సినిమాలో నటిస్తున్నాడు. ఈ సినిమా కోసం రజనీకాంత్‌ని సల్మాన్‌ఖాన్‌ వాడేస్తాడట. అదెలా.? అన్నది ప్రస్తుతానికి సస్పెన్సే. 

'నన్ను పిలవకపోయినాసరే, రజనీకాంత్‌ని చూడటానికే వచ్చాను..' అంటూ సల్మాన్‌ఖాన్‌, 'రోబో 2.0' ఫస్ట్‌ లుక్‌ విడుదల కార్యక్రమానికి హాజరై, రజనీకాంత్‌ మీద తన అభిమానాన్ని చాటుకోవడం వెనుక కారణం ఇదేనట. ఈ గాసిప్‌లో నిజమెంతోగానీ, షారుక్‌ వాడేసుకున్నాడు గనుక, అదే రూట్‌లో మరికొంతమంది బాలీవుడ్‌ హీరోలు రజనీకాంత్‌ ఇమేజ్‌ని తమ సినిమాలకు ప్లస్‌ అయ్యేలా చేసుకున్నా అందులో వింతేమీ వుండకపోవచ్చు. '2.0' సినిమాలో విలన్‌గా నటిస్తున్న అక్షయ్‌కుమార్‌కి ఈ విషయంలో ఇంకాస్త ఎడ్జ్‌ ఎక్కువే వుందండోయ్‌.!

అన్నట్టు సల్మాన్ ఖాన్ తో సినిమా ఎప్పుడు.? అని రజనీకాంత్ ని ప్రశ్నిస్తే, ఆయన ఎప్పుడంటే అప్పుడు తాను రెడీ.. అని సమాధానమిచ్చారు సూపర్ స్టార్ రజనీకాంత్.