దాసరికి పవన్ హ్యాండిచ్చేసినట్లేనా?

టాలీవుడ్ ప్రముఖ దర్శకుడు దాసరి నారాయణరావుతో సినిమా చేస్తా అని పవర్ స్టార్ పవన్ కళ్యాణ్ ఎప్పుడో ప్రకటించారు. ఆ సినిమాకు కేవలం నిర్మాతను మాత్రమే అని, డైరక్టర్, స్క్రిప్ట్ అన్నీ పవన్ నే సెలెక్ట్ చేస్తారని దాసరీ అన్నారు. ఆ తరువాత ఇదే వార్త చాలా సార్లు చక్కర్లు కొట్టింది. కానీ ఇప్పుడు టాలీవుడ్ లేటెస్ట్ గ్యాసిప్ ఏమిటంటే, దాసరి-పవన్ సినిమా ఇప్పట్లో వుండదని.  డైరకర్లు డాలీ, త్రివిక్రమ్ శ్రీనివాస్, ఆర్ టీ నీసన్ లతో సినిమా చేయడానికి గ్రీన్ సిగ్నల్ ఇచ్చేసారు. 

వీటిని వరుసగా శరద్ మురార్, రాధాకృష్ణ, ఎఎమ్ రత్నం నిర్మిస్తారు. ఇవి కాక పవన్ దగ్గర ఇంకో రెండు అడ్వాన్స్ లు వున్నాయని వినికిడి. వాటిలో మైత్రీ మూవీస్ వారి అడ్వాన్స్ ఒకటి. దాసరి దగ్గర మాత్రం అడ్వాన్స్ తీసుకోలేదని టాక్. దాసరి ఇస్తానని అన్నా, అంటున్నా పవన్ తీసుకోలేదని తెలుస్తోంది. అంటే మరి దాసరితో సినిమా చేసే అయిడియా పవన్ కు లేదేమో అన్న గుసగుసలు ఇండస్ట్రీలో వినిపిస్తున్నాయి. ఈ సినిమా గురించే ఇప్పటికే దాసరి రెండు సార్లు పవన్ తో కదిపే ప్రయత్నం కూడా చేసారని వార్తలు వినిపిస్తున్నాయి.

ఇప్పుడు పవన్ చేయబోయే సినిమాలు మూడూ ఇంకా సెట్ మీదకు వెళ్లనివే. ఎలా లేదన్నా 2017లో రెండు సినిమాలు రావచ్చు. 2018లోకి మరో సినిమా వుంటుంది. ఈ మూడు తరువాత మైత్రీ వాళ్లకు చేయాలి. అక్కడికి 2018 కూడా పూర్తయిపోతుంది. ఎన్నికలు కూడా దగ్గరకు వచ్చేస్తాయి. మరి దాసరికి చాన్స్ ఎప్పుడో?