‘కబాలి’ హైప్‌ ఆకాశంలో వుందిగానీ..

రజనీకాంత్‌ హీరోగా తెరకెక్కిన 'కబాలి' చిత్రం విడుదలకు సిద్ధమయ్యింది. ఈపాటికే సినిమా విడుదల కావాల్సి వున్నా కొన్ని కారణాలతో వాయిదా పడుతూ వస్తోంది. ప్రస్తుతానికైతే ఇంకా 'కబాలి'కి విడుదలకు సంబంధించి 'అధికారిక ప్రకటన' అయితే వెలువడటంలేదు. అదిగో కబాలి.. ఇదిగో కబాలి.. అంటూ రజనీ అభిమానులు మాత్రం ఇప్పటికే పెరిగిన హైప్‌ని ఇంకా ఇంకా పెంచేసుకుంటూ పోతున్నారు. 

నిలువెత్తు కటౌట్లకు ఢోకా లేదు. ఏకంగా విమానానికే కబాలి డిజైన్లు అద్దేశారు. కనీ వినీ ఎరుగని రీతిలో 'కబాలి' కోసం ప్రీమియర్‌ టిక్కెట్లను సిద్ధం చేశారు. ఆ టిక్కెట్లు కూడా వెరైటీ వెరైటీగా రూపొందిస్తున్నారు. రజనీకాంత్‌ విగ్రహాల్ని తయారు చేయడమే కాదు, అప్పుడే వాటికి పూజలు కూడా మొదలు పెట్టేశారు. విడుదల ఆలస్యమవుతుండడంతో అభిమానుల్లో టెన్షన్‌ కూడా పెరిగిపోతోంది. 

రజనీకాంతో మరో వారం రోజుల్లో చెన్నయ్‌కి వస్తున్నారనీ, సినిమా ప్రమోషన్‌ కార్యక్రమాల్లో పాల్గొంటారనీ చిత్ర దర్శక నిర్మాతలు ఇప్పటిదాకా చెబుతూ వచ్చారు. అయితే రజనీకాంత్‌ నుంచి, ఆయన కుటుంబ సభ్యుల నుంచి ఈ విషయమై ఎలాంటి ఖచ్చితమైన సమాచారమూ లేదు. అనారోగ్యంతో విదేశాలుకు వెళ్ళిన రజనీకాంత్‌ ఇప్పుడెలా వున్నారో కూడా ఎవరికీ తెలియని పరిస్థితి. వీడియో ఫుటేజ్‌తో అయినా సినిమా ప్రమోషన్‌లో వేగం పెంచాలని అనుకున్నా, దానికి సైతం రజనీకాంత్‌ అందుబాటులో లేరని తెలుస్తోంది. 

కాగా, తెలుగు, తమిళంతోపాటు, హిందీ సహా పలు భారతీయ భాషల్లోనూ, కొన్ని విదేశీ భాషల్లోనూ 'కబాలి' విడుదల కానుంది. ఇంతకీ, రజనీకాంత్‌ 'కబాలి'తో ప్రేక్షకుల ముందుకొచ్చేదెప్పుడు.? ఇది మాత్రం ప్రస్తుతానికి సస్పెన్సే.