Epaper
హీరో అంటే ఎలా వుంటారు..అందునా టాలీవుడ్ లో అంటే..అంత ఎత్తున వుంటారు. అడియో ఫంక్షన్లలో చెప్పడానికి ఎంతయినా వుంటుంది. మీరే మా దేవుళ్లు..మీరు లేకుంటే మేం ఇక్కడ లేం,.. మీ రుణం తీర్చుకోలేం. ఇలా.. చాలా. కానీ అదే అభిమానులు ఓ ఫొటోనో, ఆటోగ్రాఫ్ నో అడిగితే మాత్రం సవాలక్ష సమస్యలు. పవన్ అభిమానులకు ఇలాంటి చేదు అనుభవమే ఇటీవల ఎదురైంది.
తమ అభిమాన హీరో పవన్ సినిమా విడుదలవుతోంది. ఓసారి సెట్ కు వస్తాం..వీలయితే ఓ ఫొటో..అంటూ కబురు చేసారట కొందరు అభిమానులు పవర్ స్టార్ కు. సరే, అనుమతి వచ్చింది. ఇరవై మందికి పైగానే సెట్ వెళ్లారు. సార్ వస్తారు..లైన్లో నిల్చోండి..ఒకరి తరువాత ఒకరు ఫోటో దిగుదురు గానీ అని ఆదేశాలు జారీ అయ్యాయి. సరే, మన హీరో.. ఆ ఆనందమే వేరు. అందుకే లైన్ లో ఓపిగ్గా నిల్చున్నారు.
అక్కడ అదే సమయంలో సర్దార్ గబ్బర్ సింగ్ లో టైటిల్ సాంగ్ కోసం కొన్ని బిట్ సీన్లు తీస్తున్నారు. అందుకోసం ఓ బైక్ కూడా రెడీగావుంది. ఇంతలో ఈ అభిమానుల దురదృష్టం గాడిద తన్ను తన్నింది. ఆ బైక్ స్టార్ట్ కాలేదు. దానికేం సమస్య వచ్చిందో.. స్టార్ట్ కానని మొరాయించింది. అంతే పవర్ స్టార్ కు మూడు ఆఫ్ అయిపోయిందని వినికిడి. ఛ..అనుకుంటూ ఆయన సెట్ నుంచి చికాకుగా వెళ్లిపోయారట.
ఇక అభిమానులకు ఫొటోలు లేవు.. పలకరింపులు అంతకన్నా లేవు.. కేవలం ఎండలో కాస్సేపు క్యూలో నిల్చోవడమే మిగిలింది. ఇలా వెళ్లిన వాళ్లలో కొంతమంది వెస్ట్ గోదావరి నుంచి పని గట్టుకు వచ్చిన వారు కూడా వున్నారు పాపం.