మధ్యలోకి మాఫియా ఎందుకొచ్చినట్టు.?

ప్రీతి జింటా.. నెస్‌ వాడియా.. మధ్యలో మాఫియా.. ఇదేదో కొత్త సినిమా టైటిల్‌ అనుకుంటున్నారా.? కాదండీ.. అసలు విషయమేంటంటే, నెస్‌ వాడియా తనను దుర్భాషలాడారంటూ ప్రీతి జింటా పోలీసులకు ఫిర్యాదు చేసిన దరిమిలా, నెస్‌ వాడియాపై పోలీసులు కేసు నమోదు చేశారు. కేసు విచారణలో వుంది. ఈలోగా నెస్‌ వాడియాని మాఫియాకు చెందిన కొందరు బెదిరింపులకు దిగుతున్నారట.

రవి పుజారి అనే ఓ అండర్‌ వరల్డ్‌ డాన్‌ నుంచి నెస్‌ వాడియాకి బెదిరింపులు వస్తున్నాయన్న విషయాన్ని పోలీసులు సైతం ధృవీకరిస్తున్నారు. ఇందుకు సాక్ష్యాలుగా నెస్‌ వాడియా మొబైల్‌కి వచ్చిన ఎస్‌ఎంఎస్‌లను చూపిస్తున్నారు ముంబై పోలీసులు. నెస్‌ వాడియా ముంబైలో ప్రముఖ వ్యాపారవేత్త. ఐపీఎల్‌లో పంజాబ్‌ జట్టుకి ప్రీతితో కలిసి ‘ఓనర్‌’గా వ్యవహరిస్తూ వచ్చారు. ఒకప్పుడు ప్రీతి, నెస్‌ వాడియా భార్యాభర్తలవుదామనుకున్నారుగానీ, ఏమయ్యిందో.. ఇద్దరూ తమ ప్రేమాయణానికి బ్రేక్‌ వేసి, విడిపోయారు.

ఇప్పుడు చూస్తే, నెస్‌ వాడియాపై ప్రీతి జింటా పోలీస్‌ కేస్‌ పెట్టడం.. అదే సమయంలో నెస్‌ వాడియాకి మాఫియా నుంచి బెదిరింపులు. ప్రీతి, పోలీసులతోపాటు మాఫియాని ఆశ్రయించిందా.? లేదా ఈ ఎపిసోడ్‌ని అడ్డం పెట్టుకుని మాఫియా రంగంలోకి దిగి నెస్‌ వాడియాని బెదిరిస్తోందా.? అన్నవి పోలీసు విచారణలో తేలతాయి.