Epaper
తన తాజా చిత్రం ‘బాబీ జాసోస్‌’ సినిమాలో బాలీవుడ్‌ బ్యూటీ విద్యాబాలన్‌ ‘డిటెక్టివ్‌’గా కన్పించబోతోన్న విషయం విదితమే. నిజ జీవితంలో డిటెక్టివ్‌ అయితే ఎవరి మీద ఫోకస్‌ పెడతారు.? అని మీడియా అడిగితే, తడుముకోకుండా సినీ నటుల్లో అమితాబ్‌ బచ్చన్‌ మీదా, రాజకీయ ప్రముఖుల్లో నరేంద్ర మోడీ మీదా ఫోకస్‌ పెడ్తానని సమాధానమిచ్చింది విద్యాబాలన్‌.
అమితాబ్‌ గురించి తెలుసుకోవాల్సినవి చాలా విషయాలున్నాయనీ, అవన్నీ డిటెక్టివ్‌ అవతారమెత్తి తెలుసుకోవాలని వుందని మనసులో మాటని విద్యాబాలన్‌ బయటపెట్టింది. దేశానికి సేవ చేసే విషయమై నరేంద్ర మోడీ ఆలోచనల్ని డిటెక్టివ్‌లా పసిగడ్తానని విద్యాబాలన్‌ చెప్పుకొచ్చింది. అంతా చెప్పేసి, ‘జస్ట్‌ ఫర్‌ జోక్‌..’ అంటూ నవ్వేసిందామె.
ఇక, సీరియస్‌గానే.. అంటూ ఇంకో ఆసక్తికరమైన వ్యాఖ్య చేసింది. మతం ముసుగులో స్వామీజీలు కొందరు ప్రజల్ని తప్పుదోవ పట్టిస్తున్నారనీ, అలాంటివారి ఆటకట్టించాల్సి వుందనీ, తానే డిటెక్టివ్‌ అయితే నకిలీ స్వామీజీల బండారం బయటపెడ్తానని విద్యాబాలన్‌ చెబుతోంది. ‘బాబీ జాసోస్‌’ సినిమా ప్రమోషన్‌లో భాగంగా విద్యాబాలన్‌ ఈ వ్యాఖ్యలు చేసింది.