Epaper
చిరంజీవితో ‘ఇంద్ర’, ‘శంకర్‌దాదా జిందాబాద్‌’ సినిమాల్లో హీరోయిన్‌గా నటించిన సోనాలి బింద్రే బుల్లితెరపై సీరియల్స్‌లో కన్పించబోతోంది. ‘అజీబ్‌ దాస్తాన్‌ హై ఏ’ అనే సీరియల్‌ ద్వారా బుల్లితెరపై కన్పించనుండడం చాలా ఆనందంగా వుందని సోనాలి బింద్రే చెప్పుకొచ్చింది. బాలీవుడ్‌ నిర్మాత, టీవీల్లో మెగా ప్రొడ్యూసర్‌ అయిన ఏక్తా కపూర్‌ ఈ సీరియల్‌కి నిర్మాత కావడం విశేషం.
‘సీరియల్‌లో నాకు ఆఫర్‌ చేసిన పాత్ర నాకు చాలా బాగా నచ్చింది.. అందుకే బుల్లితెరపై సీరియల్స్‌లో కన్పించాలనే నిర్ణయానికి వచ్చాను..’ అని చెప్పింది సోనాలి బింద్రే, టీవీ సీరియల్‌లో నటించడంపై అడిగిన ఓ ప్రశ్నకు సమాధానమిస్తూ. వెండితెరపై హీరోయిన్‌గా ఓ వెలుగు వెలిగిన తనకు, బుల్లితెర ఎప్పుడూ చిన్నదిగా కన్పించలేదనీ, వెండితెరకు ధీటుగా బుల్లితెర వెలిగిపోతోందని సోనాలి అభిప్రాయపడింది.
టాలీవుడ్‌లో పలు సినిమాల్లో నటించిన సోనాలి, తమిళంలోనూ చాలా సినిమాల్లో కన్పించింది. హిందీలోనూ స్టార్‌ డమ్‌ సంపాదించుకున్న సోనాలి, పెళ్ళయ్యాక సినిమాలకు కాస్త దూరంగా వుంటోంది. మంచి మంచి కథలు దొరికితే వెండితెరపైనా రెగ్యులర్‌గా కన్పిస్తానంటోంది ఈ అందాల భామ.