అజ్ఞాతవాసి అమెరికా వెళ్తాడా?

పవన్ ఇప్పుడు అజ్ఞాతవాసి. 9న ప్రీమియర్లతో జనం ముందుకు రాబోతున్నాడు. ఇదిలా వుంటే అమెరికాలో అజ్ఞాతవాసి విడుదల సందర్భంగా పవన్ వెళ్లి అభిమానులను కలిసే అవకాశం వుందని వార్తలు అందుతున్నాయి. అయితే విడుదలకు ముందో, విడుదల నాడో పవన్ అమెరికా వెళ్లకపోవచ్చు. 9న ప్రీమియర్ల టాక్ చూసుకుని, పవన్ అమెరికా పర్యటన ప్లాన్ వుంటుదని తెలుస్తోంది.

ఎల్ఎ తెలుగుసంస్థ అజ్ఞాతవాసి సినిమా హక్కులను భారీ రేటుకు కొన్నారు. కొనడమే కాకుండా, భారీ ఎత్తున ప్రచారం చేస్తున్నారు. ఇంతవరకు ఏ భారతీయ సినిమా విడుదల కానన్ని స్క్రీన్ లలో అజ్ఞాతవాసిని విడుదల చేస్తున్నారు. పైగా అజ్ఖాతవాసి సినిమా ప్రచారం కోసం భారీగా ఖర్చు చేస్తున్నారు. ఇందుకోసం అమెరికాలోనే పవన్ ఫ్యాన్స్ కు కామన్ టీ షర్ట్ ల్లాంటివి భారీగా ప్లాన్ చేసినట్లు తెలుస్తోంది.

దీనంతటికి తోడు పవన్ ను అమెరికా తీసుకెళ్తే ఆ ఊపే వేరుగా వుంటుంది. ఇప్పుడు అదే ప్లాన్ చేస్తున్నట్లు వినికిడి. అయితే సినిమా టాక్ చూసుకుని పవన్ డేట్లు ఇస్తే, ఆయన, ఆయనతో పాటు త్రివిక్రమ్ అమెరికా వెళ్తారు. త్రివిక్రమ్ అమెరికా థియేటర్లో అడుగుపెడితే, ఆ హడావుడి వేరుగా వుంటుంది.

అయితే ఇదంతా ఓవర్ సీస్ బయ్యర్ కు కాస్త భారమే. కనీసం 50లక్షల వరకు భారం పడే అవకాశం వుంటుంది. ఎందుకంటే ఇక్కడి నుంచి ఫస్ట్ క్లాస్ ఎయిర్ టికెట్ లు, అమెరికాలో చార్టర్ ఫ్లయిట్ వగైరావుంటాయి కదా?