గోపీచంద్ కోసం ఆమె పాట

చాన్నాళ్లుగా వార్తల్లో నలుగుతున్న సినిమా ఆక్సిజన్. గోపీచంద్ హీరోగా సీనియర్ నిర్మాత ఎఎమ్ రత్నం, తన కుమారుడు జ్యోతికృష్ణ డైరక్షన్ లో నిర్మించిన సినిమా ఇది. నిజానికి ఈ సినిమా గౌతమ్ నందా కన్నా ముందే రెడీ కావాలి. కానీ సవాలక్ష కారణాలతో ఆలస్యం అవుతూ వస్తోంది. గౌతమ్ నందా కనుక హిట్ అయివుంటే ఆ వెంటనే వచ్చేసేది. కానీ అక్కడా సమస్య ఎదురైంది. ఆఖరికి ఇప్పడు విడుదలకు రెడీ చేస్తున్నారు. ఒక్కోపాట విడుదల చేసే కార్యక్రమం ప్రారంభించారు.

ఇదిలా వుంటే ఈ సినిమాలో ఓ పాటను ఐశ్వర్య పాడేసారట. ఆమె ఎవరో కాదు. అదే సినిమాకు నిర్మాత. అంతేకాదు ఆక్సిజన్ సినిమా డైరక్టర్ జ్యోతికృష్ణ భార్య. సినిమాల్లో హీరోలు, హీరోయిన్లు గొంతు కలపడం, పాట పాడడం కామన్. కానీ నిర్మాత గొంతు సవరించుకోవడం ఇదేనేమో? మాస్ట్రో ఇళయరాజా తనయుడు యువన్ శంకర్ రాజా ఈ సినిమాకు సంగీత దర్శకుడు. సుస్వరం అయి వుండి, పాటకు తగిన గాత్రం కాకుంటే యువన్ లాంటి మ్యూజిక్ డైరక్టర్లు మొహమాటాలకు పోరు. అందువల్ల అలా పాడించారు అంటే, ఐశ్వర్య స్వరం బాగుండే వుండాలి.