Epaper
ఏపీ డిప్యూటీ సీఎం పవన్ కల్యాణ్ ను అభినందించేందుకు తెలుగు చిత్ర పరిశ్రమ యాక్టివ్ ప్రొడ్యూసర్స్ లో కొంతమంది ప్రత్యేకంగా వెళ్లి కలిశారు. వీళ్లలో దిల్ రాజు, సురేష్ బాబు, అల్లు అరవింద్ లాంటి ప్రముఖులున్నారు.
వీళ్లంతా పవన్ తో ఫొటోలు దిగారు. అయితే వీళ్ల కంటే, ఓ ఫొటో మాత్రం అందర్నీ ఆకర్షించింది. అదే పవన్ కల్యాణ్, సుప్రియ ఫొటో. అన్నపూర్ణ స్టుడియోస్ తరఫున పవన్ కల్యాణ్ ను కలిసేందుకు వెళ్లారు సుప్రియ. వీళ్లిద్దరూ కలిసి దిగిన ఫొటో ప్రస్తుతం సోషల్ మీడియాలో ట్రెండింగ్ అవుతోంది.
దాదాపు 28 ఏళ్ల కిందట అక్కడ అమ్మాయి ఇక్కడ అబ్బాయి సినిమాలో కలిసి నటించారు పవన్-సుప్రియ. వాళ్లిద్దరికీ అదే తొలి సినిమా. ఆ సినిమా తర్వాత పవన్ అంచెలంచెలుగా ఎదిగి పవర్ స్టార్ అయ్యారు. సుప్రియ మాత్రం మెల్లమెల్లగా యాక్టింగ్ నుంచి తప్పుకున్నారు.
కట్ చేస్తే, ఇప్పుడు పవన్ కల్యాణ్ ఆంధ్రప్రదేశ్ ఉప ముఖ్యమంత్రి అయ్యారు. సుప్రియ అన్నపూర్ణ స్టుడియోస్ వ్యవహారాలన్నీ చూసుకుంటూ నిర్మాతగా రాణిస్తున్నారు. ఇద్దరివీ కొత్త పాత్రలే. అందుకే పవన్-సుప్రియ కలిసి దిగిన ఫొటో వైరల్ గా మారింది.