రాజమౌళి సినిమా కంటే ముందే తెరపైకి మహేష్

మహేష్ బాబు హీరోగా రాజమౌళి దర్శకత్వంలో సినిమా ఇంకా సెట్స్ పైకి రాలేదు. అది ఎప్పుడు రిలీజ్ అవుతుందో ఇప్పటికిప్పుడు రాజమౌళి కూడా చెప్పలేడు. ఈ గ్యాప్ లో తెరపైకి రాబోతున్నాడు మహేష్. అయితే అతడు కనిపించడు. అతడి గొంతు మాత్రం వినిపిస్తుంది.

ప్రపంచవ్యాప్తంగా హిట్టయిన ది లయన్ కింగ్ కు సీక్వెల్ వస్తోంది. మఫాసా పేరిట తెరకెక్కిన ఈ సినిమా క్రిస్మస్ కానుకగా డిసెంబర్ 20న ప్రపంచవ్యాప్తంగా విడుదలకానుంది. ఈ సినిమా తెలుగు వెర్షన్ లో మహేష్ బాబు గొంతు వినిపించబోతోంది.

సినిమాలో ముఫాసా పాత్రకు మహేష్ బాబు డబ్బింగ్ చెబుతున్నాడు. త్వరలోనే మహేష్ వాయిస్ తో ముఫాసా తెలుగు ట్రయిలర్ ను విడుదల చేయబోతున్నారు. మహేష్ డబ్బింగ్ తో టాలీవుడ్ లో ఈ ప్రాజెక్టుకు మరింత క్రేజ్ వచ్చింది.

వ్యక్తిగతంగా మహేష్ కు లయన్ కింగ్ అంటే చాలా ఇష్టం. తన కొడుకు, కూతురుతో కలిసి ఈ సినిమాను చాలాసార్లు చూశానని ప్రకటించిన మహేశ్.. తన మొబైల్ వాల్ పేపర్ గా కూడా లయన్ కింగ్ నే పెట్టున్నాడు. ఇప్పుడు ఏకంగా ఈ ప్రాజెక్టులో భాగమయ్యాడు.

ఈ సినిమాలో మరో రెండు కీలక పాత్రలకు బ్రహ్మానందం, అలీ వాయిస్ అందిస్తున్నారు. ముఫాస్ ఎర్లీ లైఫ్ ను ఈ సినిమాలో చూపించబోతున్నారు. 26న ఈ సినిమా ట్రయిలర్ రిలీజ్ అవుతుంది.