హారర్ కాదు.. సూపర్ హీరో సినిమా

హారర్ సినిమాలకు పెట్టింది పేరు లారెన్స్ మాస్టర్. కొరియోగ్రాఫర్ నుంచి దర్శకుడిగా మారి, ఆ తర్వాత నటుడిగా అవతారం ఎత్తిన లారెన్స్, హారర్ సినిమాలతోనే ఎక్కువగా గుర్తింపు తెచ్చుకున్నాడు. అతడు తీసిన కాంచన ఫ్రాంచైజీ పెద్ద హిట్.

ఇప్పుడీ హీరో కెరీర్ లో 25వ మైల్ స్టోన్ మూవీకి దగ్గరయ్యాడు. తన కెరీర్ లో ప్రతిష్టాత్మక 25వ సినిమా కోసం అతడు మరోసారి హారర్ సబ్జెక్ట్ నే ఎత్తుకున్నాడని అంతా అనుకున్నారు. కానీ అది హారర్ మూవీ కాదు, అదొక సూపర్ హీరో సినిమా.

కోనేరు సత్యనారాయణ నిర్మాతగా రమేశ్ వర్మ దర్శకత్వంలో తన 25వ చిత్రాన్ని చేయడానికి లారెన్స్ అంగీకరించిన సంగతి తెలిసిందే. ఈరోజు ఈ సినిమా టైటిల్ పోస్టర్ రిలీజ్ చేశారు. ఈ మూవీకి ‘కాల భైరవ’ అనే టైటిల్ పెట్టారు.

ఈ సందర్భంగానే ఇదొక పాన్ ఇండియా సూపర్ హీరో సినిమా అనే విషయాన్ని మేకర్స్ ప్రకటించారు. వచ్చే నెల నుంచి ఈ సినిమా రెగ్యులర్ షూటింగ్ మొదలవుతుంది. వచ్చే ఏడాది వేసవి కానుకగా ‘కాలభైరవ’ను విడుదల చేస్తామని ప్రకటించారు.

ఈ సినిమాతో పాటు ఇనసి పాండియన్ దర్శకత్వంలో ఓ సినిమా చేస్తున్నాడు లారెన్స్. దీనికి తెలుగులో ‘బుల్లెట్టు బండి’ అనే టైటిల్ పెట్టారు. సాయంత్రం గ్లింప్స్ రిలీజ్ చేయబోతున్నారు.