ఒకే బ్యానర్ లో ప్రభాస్ 3 సినిమాలు

వరుస సినిమాలతో తన కెరీర్ ను, లైఫ్ ను బిజీగా మార్చుకున్న ప్రభాస్.. హోంబలే ఫిలిమ్స్ కు బంపరాఫర్ ఇచ్చాడు. ఆ బ్యానర్ పై బ్యాక్ టు బ్యాక్ 3 సినిమాలు చేయబోతున్నాడు ఈ పాన్ ఇండియా హీరో.

ఈ విషయాన్ని హోంబలే ఘనంగా ప్రకటించింది. మరిచిపోలేని సినిమాటిక్ అనుభూతిని అందించేందుకు, ఇండియన్ సినిమాను మరింత ముందుకు తీసుకెళ్లేందుకు, రెబల్ స్టార్ తో 3 సినిమాలు చేయబోతున్నట్టు ప్రకటించింది హోంబలే.

ఈ కొత్త ప్రయాణం సలార్-2తో ప్రారంభమౌతుందని తెలిపింది. అంటే, సలార్ తో కలుపుకుంటే, హోంబలే బ్యానర్ లో ప్రభాస్ కౌంట్ 4 సినిమాలన్నమాట.

ఈ 3 సినిమాలు, 2026 నుంచి వరుసగా ఏడాదికి ఒకటి చొప్పున ఉంటాయని ప్రకటించింది సదరు నిర్మాణ సంస్థ. సో.. సలార్-2, 2026లో ఉంటుందనే విషయంపై పరోక్షంగా క్లారిటీ వచ్చింది. అంతేకాదు, ఆ తర్వాత కూడా వరుసగా ఇదే బ్యానర్ పై ప్రభాస్ వర్క్ చేయబోతున్నాడు.

ఈ బ్యానర్ పై ప్రశాంత్ నీల్ దర్శకత్వంలో సలార్-2తో పాటు మరో సినిమా చేయబోతున్నాడు ప్రభాస్. ఆ మూడో సినిమా ఏంటనేది ప్రస్తుతానికి సస్పెన్స్.