విజయ్ దేవరకొండతో సత్యదేవ్

సత్యదేవ్ మంచి నటుడు. మంచి వాచకం.. కానీ హీరోగా సరైన సక్సెస్ రావడం లేదు. హీరోగా చేస్తున్నాను కదా అని, మధ్య మధ్య వేరే హీరోల సినిమాల్లో మంచి క్యారెక్టర్లు వస్తే వదులుకోవడం లేదు.

మెగాస్టార్ గాడ్ ఫాదర్ లో విలన్ గా చేసాడు. ఆర్ఆర్ఆర్ లో చిన్న పాత్ర చేసాడు కానీ అది బయటకు రాలేదు. ఇప్పుడు లేటెస్ట్ గా మరో సపోర్టింగ్ రోల్ చేస్తున్నాడు సత్యదేవ్.

విజయ్ దేవరకొండ-గౌతమ్ తిన్ననూరి కాంబినేషన్ లో వస్తున్న సినిమాలో సత్యదేవ్ ఓ కీలకపాత్ర చేస్తున్నారట. సినిమాలో మంచి కీ రోల్ నే అది అని తెలుస్తోంది. నిజానికి హీరోగా ప్రయత్నిస్తూనే ఇలాంటి రోల్స్ ఎక్కువగా చేయడం ద్వారా సత్యదేవ్ ప్రేక్షకులకు మరింత దగ్గర కావచ్చు. చాలా మంది హీరోలు ఇలా చేసి, పైకి వచ్చిన వారే. అందువల్ల సత్యదేవ్ కూడా అదే రూట్ లో వెళ్లొచ్చు. వెళ్తున్నట్లు కనిపిస్తోంది.

విజయ్ దేవరకొండ-గౌతమ్ తిన్ననూరి సినిమా మీద మంచి అంచనాలు వున్నాయి. సినిమా హిట్ కొట్టి, సత్యదేవ్ పాత్ర కనుక పండితే, ఆపర్లు బాగుంటాయి. ఎందుకంటే ఇప్పుడు మన హీరోలు తమ సినిమాల్లో హీరో పాత్రతో సమానమైన పాత్రలు వుంటే బాగుంటుంది అనే చూస్తున్నారు. గతంలో ఇలా వుండేది కాదు. ఇప్పుడు ట్రెండ్ మారుతోంది. దీన్ని సత్యదేవ్ లాంటి మంచి నటులు అందిపుచ్చుకోవాలి.