ప్రభాస్ తో సినిమా.. దీపిక పదుకోన్ రియాక్షన్ ఇది

ప్రభాస్ హీరోగా ప్రాజెక్ట్-K అనే సినిమా తెరకెక్కుతున్న సంగతి తెలిసిందే. ఇందులో ప్రభాస్ సరసన బాలీవుడ్ బ్యూటీ దీపిక పదుకోన్ హీరోయిన్ గా నటిస్తోంది. ఈ సినిమా అంగీకరించడానికి ప్రధాన కారణాన్ని బయటపెట్టింది దీపిక. పనిలోపనిగా సినిమాలో తన పాత్ర తీరుతెన్నులపై స్పందించింది.

“కెమెరా నాకు కొత్త కాదు, షూటింగ్స్ కొత్త కాదు. కానీ ప్రాజెక్ట్-K సినిమాపై మాత్రం కాస్త భావోద్వేగానికి గురయ్యాను. ప్రభాస్ తో ఇంతకుముందు వర్క్ చేయలేదు. నాగ్ అశ్విన్ తో కూడా కలిసి పనిచేయలేదు. పైగా కొత్త భాషలో సినిమా చేస్తున్నాను. కానీ ఇవేవీ కారణం కాదు. నా భావోద్వేగానికి అసలు కారణం సినిమాలో నా పాత్ర, ఆ సినిమా కథ. అదొక కొత్త ప్రపంచం, నా పాత్ర చాలా చాలా కొత్తగా ఉంటుంది. ఓవైపు ఉత్సుకతగా ఉంది, మరోవైపు ఎంతో ఎక్సయిటింగ్ గా ఉంది. ఈ సినిమా కోసం ఇంకా ఏదో చేయాలనిపిస్తోంది. ఇలా ఎన్నో ఎమోషన్స్.”

ఇలా ప్రాజెక్ట్-K సినిమాపై స్పందించింది దీపిక. సైన్స్-ఫిక్షన్ కాన్సెప్ట్ తో వస్తున్న ఈ సినిమా కథను తను ఇప్పటివరకు ఎక్కడా చూడలేదని, ఎక్కడా చదవలేదని చెప్పుకొచ్చింది. సినిమాలో గ్రాఫిక్స్ కూడా చాలా కొత్తగా ఉంటాయని చెబుతోంది. మరోవైపు ప్రభాస్ పై కూడా స్పందించింది.

ప్రభాస్ కు కాస్త సిగ్గు ఎక్కువని, సెట్స్ లో తక్కువగా మాట్లాడతాడనే విషయం తనకు కూడా తెలుసని.. తను కూడా సెట్స్ లో అలానే ఉంటానని అంటోంది దీపిక. ఇక ఎప్పట్లానే ప్రభాస్, దీపిక పదుకోన్ కు కూడా ఆంధ్రా వంటకాల్ని రుచిచూపించాడు. సెట్స్ పైకొచ్చిన రెండో రోజే దీపిక కోసం దాదాపు 15 రకాల వంటకాల్ని సిద్ధం చేశాడు. వాటిని ఫొటో తీసి తన సోషల్ మీడియా ఎకౌంట్ లో దీపిక పోస్ట్ చేసింది కూడా.