Epaper
“రేయ్ డానీ.. బయటకు రారా నా కొడకా” అంటూ పవన్ కల్యాణ్ వీరావేశంతో భీమ్లానాయక్ సినిమాలో రానాను ఉద్దేశించి చెప్పిన డైలాగ్ విన్నాం. మరి అంతే ఆవేశంతో రానా కూడా పవన్ పై తన కోపాన్ని ప్రదర్శిస్తే ఎలా ఉంటుంది. ఆ టైమ్ రానే వచ్చింది. భీమ్లానాయక్ నుంచి రానా ప్రోమో రిలీజైంది. డానియల్ శేఖర్ గా రానా ఎగ్రెసివ్ లుక్ ను విడుదల చేశారు మేకర్స్.
“బెదిరిస్తే భయపడతానా. వాడి కంటే గట్టిగా అరవగలను. ఎవడాడు. దిగొచ్చాడా.” అంటూ భీమ్లానాయక్ ను ఉద్దేశించి రానా చెప్పిన డైలాగ్స్ హైలెట్ గా నిలిచాయి. ఈ ఒక్క వీడియోతో సినిమాలో రానా పాత్ర ఎలా ఉండబోతోందనే విషయంపై క్లారిటీ వచ్చింది.
నిజానికి మొన్నటివరకు ఈ సినిమాలో రానా పాత్రపై చాలామందికి అనుమానాలు ఉండేవి. పవన్ కోసం రానా పాత్రను తగ్గించారని, మలయాళం వెర్షన్ లో ఉన్నంత ఎగ్రెసివ్ నెస్ ను రానా పాత్రలో చూపించడం లేదంటూ ప్రచారం జరిగింది. తాజా వీడియోతో ఈ అనుమానాలకు తెరపడింది. ఆ డైలాగ్స్ వింటుంటే.. ఒరిజినల్ వెర్షన్ లో ఉన్న ఫ్లేవర్ ను తెలుగులోకి కూడా తీసుకొచ్చారనిపిస్తోంది.
రానా పుట్టినరోజు సందర్భంగా విడుదల చేసిన ఈ వీడియోలో మరోసారి రిలీజ్ డేట్ పై యూనిట్ స్పష్టతనిచ్చింది. జనవరి 12న థియేటర్లలోకి వస్తున్నామంటూ.. ఈ సినిమా విడుదల తేదీపై నడుస్తున్న ప్రచారానికి తెరదించింది.
ఈ సినిమాకు త్రివిక్రమ్, డైలాగ్స్ రాశాడు. స్క్రీన్ ప్లే కూడా సమకూర్చిపెట్టాడు. సాగర్ చంద్ర దర్శకుడు. పవన్ సరసన నిత్యామీనన్, రానా సరసన సంయుక్త హీరోయిన్లుగా నటిస్తున్నారు. తమన్ సంగీత దర్శకుడు.