ముచ్చటగా మూడో ట్రయిలర్

డిసెంబర్..జ‌నవరి నెలలు సినిమా ప్రియులకు పండగ నెలలుగా మారిపోయాయి. వైవిధ్యమైన భారీ సినిమాలు పక్కాగా లైన్ కడుతున్నాయి. ఆర్ఆర్ఆర్ సినిమా సంగతి వివరించనక్కరలేదు. ఆ ట్రయిలర్ వచ్చింది. 

సినిమా మీద అంచనాలు ఆకాశానికి చేర్చేసింది. పుష్ప ట్రయిలర్ వచ్చింది. బన్నీ ఫ్యాన్స్ ను ఉర్రూతలూగించింది. విడుదల మరో నాలుగయిదు రోజుల్లో వుంది. టికెట్ కౌంటర్ ఓపెన్ అయింది. ఫుల్ స్వింగ్ లో నడుస్తోంది. ఇక ఇప్పుడు ముచ్చటగా మూడో ట్రయిలర్ రాబోతోంది.

నాని నటించిన శ్యామ్ సింగ రాయ్ ట్రయిలర్ రేపు విడుదల కాబోతోంది. వరంగల్ లో జ‌రిగే ప్రీ రిలీజ్ ఈవెంట్ లో ట్రయిలర్ విడుదల చేస్తారు. నాని ఫ్యాన్స్ మాత్రమే కాదు. రెగ్యులర్ సినిమా ఆడియన్స్ కూడా ఈ ట్రయిలర్ కోసం ఆసక్తిగా చూస్తున్నారు. సాధారణంగా నాని మేకోవర్ మీద మరీ ఎక్కువ దృష్టి పెట్టరు. పాత్రలోకి తన నటనతో మారడానికే చూస్తారు.

కానీ శ్యామ్ సింగ రాయ్ లో వింటేజ్ బెంగాలీ బాబు లుక్ లోకి పక్కాగా మారిపోయారు నాని. ఇప్పటి వరకు వదిలిన స్టిల్స్ అన్నీ అవే. ప్రతి స్టిల్ కూడా అలనాటి కాలం బెంగాలీ రైటర్స్ గెటప్ ను గుర్తుకు తెస్తోంది. అందువల్ల ఈ సినిమా మీద ఆసక్తి పెరగడంతో, ట్రయిలర్ కోసం చూస్తున్నారు.

ఈ మూడూ కాకుండా ఇంకా రాధేశ్యామ్ ట్రయిలర్ వుంది. అది కూడా ఓ వారంలో వచ్చేస్తుంది. భీమ్లా నాయక్ ట్రయిలర్ మాత్రం డిసెంబర్ లో అయితే రాదు.