ఆహాలో అన్ స్టాపబుల్ బాలయ్య

ఎవరైనా చాట్ షో చేస్తే ఆసక్తి కరంగానే వుంటుంది. ఇప్పటి వరకు సినిమా సెలబ్రిటీలు చాలా మంది చాట్ షో లు చేసారు. 

మంచు లక్ష్మి నుంచి సమంత వరకు. ఆలీ నుంచి రానా వరకు. కానీ ఇవన్నీ ఒక ఎత్తు. నందమూరి బాలయ్య చాట్ షో చేస్తే మరో ఎత్తు. ఆహా డిజిటల్ ప్లాట్ ఫారమ్ లో బాలయ్య ఓ చాట్ షో చేయబోతున్నారు.

దాని పేరు 'అన్ స్టాపబుల్' అని పెడుతున్నట్లు బోగట్టా. ఈ ప్లాట్ ఫారమ్ మీద ఆయన పలువురు సినిమా సెలబ్రిటీలను ఇంటర్వూ చేయబోతున్నారు. ముచ్చటించబోతున్నారు. తొలి ఎపిసోడ్ మంచు ఫ్యామిలీ సభ్యులతోనో, మోహన్ బాబుతోనో వుంటుందని వినిపిస్తోంది.

వాస్తవానికి బాలయ్య కు బోలెడు పరిజ్ఞానం వుంది. పురాణాలు, ఇతిహాసాలు, మంత్రాలు, ముహుర్తాలు ఇలా చాలా తెలుసు. కానీ ఆయన మాట్లాడే తీరు భలే చిత్రంగా వుంటుంది. అంతా దబిడి ధిబిడే. అలాంటి బాలయ్య షో చేస్తే ఎలా వుంటుందో చూడాలి. 

షో చూసే వాళ్ల సంగతి ఎలా వున్నా, మీమ్స్ చేసేవారికి, ట్రోల్ చేసేవారికి పండగే.