ఈ మెగా టైటిల్స్ వెనక మతలబు ఏంటి?

మెగా హీరోల సినిమాలంటే కథతో సంబంధం లేకుండా ఓ మాస్ టైటిల్ కోసం వెదుకుతుంటారు. నిన్న మొన్నటివరకు అలానే జరిగింది కూడా. కానీ ఇప్పుడో రెండు టైటిల్స్ మాత్రం ఆసక్తి రేకెత్తిస్తున్నాయి. కాస్త డిఫరెంట్ గా ఉండడంతో పాటు సినిమాపై ఉత్సుకత పెంచేలా ఉన్నాయి. అయితే ఇవి అఫీషియల్ టైటిల్స్ మాత్రం కావు.

పవన్ కల్యాణ్, హరీష్ శంకర్ కాంబినేషన్ లో త్వరలోనే సెట్స్ పైకి రాబోతోంది ఓ సినిమా. ఈ సినిమాకు ''భవదీయుడు భగత్ సింగ్'' అనే టైటిల్ పెట్టినట్టు పుకార్లు వినిపిస్తున్నాయి. నిజంగా ఈ టైటిల్ ఫిక్స్ చేస్తారా, లేక మాస్ టైటిల్ పెడతారా అనే విషయాన్ని పక్కనపెడితే.. ఇది మాత్రం ఇంట్రెస్టింగ్ గా ఉంది. భగత్ సింగ్ అంటే రెబల్, భవదీయుడు అనే పదంలో ఓ రకమైన వినమ్రత, సౌమ్యం కనిపిస్తోంది. ఈ రెండూ కలిపి టైటిల్ గా మార్చేశారు కొంతమంది.

ఇక ఈరోజు లాంఛ్ కాబోతున్న రామ్ చరణ్ కొత్త సినిమాకు కూడా ఓ డిఫరెంట్ టైటిల్ ప్రచారంలోకి వచ్చింది. శంకర్ దర్శకత్వంలో రాబోతున్న ఈ సినిమాకు విశ్వంభర అనే టైటిల్ ఫిక్స్ చేసినట్టు వార్తలొస్తున్నాయి. ఇది కూడా కాస్త సర్ ప్రైజింగ్ టైటిలే. సామాజిక అంశాలు, పొలిటికల్ బ్యాక్ డ్రాప్ తో రాబోతున్న శంకర్-చరణ్ సినిమాకు విశ్వంభర అనే టైటిల్ ప్రచారంలోకి రావడం కాస్త ఆశ్చర్యం కలిగించే విషయమే.

ప్రస్తుతం ఈ రెండు టైటిల్స్ పై మెగాభిమానుల్లో జోరుగా చర్చ సాగుతోంది. కొంతమంది వీటిపై పెదవి విరుస్తుంటే, మరికొందరు మాత్రం బాగున్నాయంటూ కామెంట్స్ పెడుతున్నారు. త్వరలోనే ఈ టైటిల్స్ పై క్లారిటీ రానుంది.