రిలీజ్ డేట్ చెప్పి పవన్ తప్పు చేశాడా?

ఇప్పుడున్న పరిస్థితుల్లో రిలీజ్ డేట్ ఎనౌన్స్ చేయడం అంటే అంతకంటే పెద్ద జోక్ ఇంకోటి లేదు. ఆల్రెడీ రిలీజ్ ఎనౌన్స్ చేసిన సినిమాలే వస్తాయో రావో తెలియని పరిస్థితి. ఇలాంటి టైమ్ లో తన కొత్త సినిమా విడుదల తేదీని ప్రకటించాడు పవన్. క్రిష్ దర్శకత్వంలో చేస్తున్న హరిహర వీరమల్లు సినిమాను వచ్చే ఏడాది ఏప్రిల్ 29న థియేటర్లలోకి తీసుకురాబోతున్నట్టు ఎనౌన్స్ చేశాడు.

ప్రస్తుత పరిస్థితుల్లో పెద్ద సినిమాలేవీ థియేటర్లలోకి వచ్చే సాహసం చేయడం లేదు. దీంతో బడా సినిమాల మధ్య గ్యాప్ తగ్గిపోయింది. రిలీజ్ డేట్స్ సమస్య ఎదురైంది. సంక్రాంతి సినిమాలే ఎన్ని వస్తాయో, ఇంకెన్ని వాయిదా పడతాయో తెలియని పరిస్థితి. ఒకవేళ సంక్రాంతి నుంచి ఏవైనా కొన్ని సినిమాలు పోస్ట్ పోన్ అయితే, అవి తప్పకుండా సమ్మర్ కే వస్తాయి. ఫిబ్రవరి లేదా మార్చిలో విడుదల చేయాలని అనుకోరు.

ఆర్ఆర్ఆర్ సంక్రాంతికే వస్తుందనే టాక్ వినిపిస్తోంది. అదే కనుక జరిగితే సంక్రాంతి బాక్సాఫీస్ నుంచి కనీసం 2 పెద్ద సినిమాలు తప్పుకుంటాయి. అవి నేరుగా వచ్చి ఏప్రిల్-మే నెలల్లో పడతాయి. వేసవికి ఆల్రెడీ కేజీఎఫ్-2 ఉంది. సలార్ కూడా అదే టైమ్ లో వస్తుందని చెబుతున్నారు. ఇలాంటి టైమ్ లో హరిహర  వీరమల్లు సినిమా తేదీని ప్రకటించడం కన్ఫ్యూజన్ పెంచడమే తప్ప మరొకటి కాదని అంటోంది ట్రేడ్.

మరోవైపు సోషల్ మీడియాలో హరిహర వీరమల్లు సినిమాపై సెటైర్లు పడుతున్నాయి. రిలీజ్ పోస్ట్ పోన్ చేయాలంటే ఏదో ఒక డేట్ చెప్పాలి కాబట్టి, యూనిట్ ఇలా విడుదల తేదీని ప్రకటించినట్టుందంటూ జోకులేస్తున్నారు.