Epaper
నాగార్జున రీసెంట్ మూవీ వైల్డ్ డాగ్. ఆల్రెడీ ఈ సినిమా థియేటర్లలోకి వచ్చి 3 రోజులైంది. సినిమా టాక్ ఏంటి.. దాని రేంజ్ ఎంత అనే విషయంపై ట్రేడ్ తో పాటు ప్రేక్షకులు కూడా ఓ అంచనాకు వచ్చేశారు. ఇలాంటి టైమ్ లో చిరంజీవిని రంగంలోకి దించాడు నాగార్జున.
ఈరోజు చిరంజీవితో ప్రత్యేకంగా ప్రెస్ మీట్ ఏర్పాటుచేశాడు నాగ్. వైల్డ్ డాగ్ ను ప్రత్యేకంగా చూసిన చిరంజీవి, ఆ సినిమాను ఆకాశానికెత్తేశారు. నాగార్జున నిబద్ధతను, దర్శకుడి పనితీరును ప్రత్యేకంగా మెచ్చుకున్నారు. తనకు సినిమా చాలా బాగా నచ్చిందని, ప్రతి ఒక్కరు ఈ సినిమా చూడాలని కోరారు.
నాగ్-చిరు మధ్య మంచి సత్సంబంధాలున్నాయి. పైగా చిరంజీవి నటిస్తున్న ఆచార్య సినిమా ప్రొడ్యూసరే, వైల్డ్ డాగ్ కు కూడా నిర్మాత. కాబట్టి చిరంజీవి వచ్చారు, మాట్లాడారు. అంతా బాగానే ఉంది కానీ, ఈ టైమ్ లో చిరంజీవితో ప్రచారం వైల్డ్ డాగ్ కు ఏ మేరకు కలిసొస్తుందనేది ఆసక్తికర అంశం.
వైల్డ్ డాగ్ సినిమాకు అన్ని వర్గాల నుంచి పాజిటివ్ టాక్ వచ్చిన మాట వాస్తవమే. మౌత్ టాక్ బాగున్న మాట కూడా నిజమే. కానీ నాగార్జున స్టార్ డమ్ కు, సినిమాకు వస్తున్న వసూళ్లకు పొంతన కుదరడం లేదు. థియేటర్లకు ప్రేక్షకుల్ని రప్పించడంలో వైల్డ్ డాగ్ ఫెయిలైంది. ఫస్ట్ వీకెండ్ కే ఈ సినిమాకు బిలో-యావరేజ్ వసూళ్లు వచ్చాయి.
ఈరోజు చాలా ఏరియాల్లో వైల్డ్ డాగ్ కు ఆక్యుపెన్సీ పడిపోయింది. ఇలాంటి టైమ్ లో చిరంజీవితో ఏర్పాటు చేసిన ప్రెస్ మీట్ ఏ మేరకు కలిసొస్తుందో చూడాలి. అంతోఇంతో వసూళ్లు రాబట్టడానికి వైల్డ్ డాగ్ కు ఉన్నది ఇంకా 3 రోజులు మాత్రమే. శుక్రవారం నుంచి వకీల్ సాబ్ థియేటర్లలోకి వస్తున్నాడు.