మూడు జనరేషన్స్ పాత్రల్లో నాని

ఒకే హీరోను మూడుదశల్లో చూపించడం కొత్తగా ఉన్న కాన్సెప్ట్ కాదు. గతంలో కొంతమంది హీరోలు ఇలా మూడు షేడ్స్ చూపించారు. ఇప్పుడు నాని కూడా ఇలానే మూడుదశల్లో కనిపించబోతున్నాడు. అవును.. తన అప్ కమింగ్ మూవీలో 3 దశల్లో కనిపించబోతున్నాడు నాని. 

'మళ్లీ రావా' ఫేం గౌతమ్ తిన్ననూరి దర్శకత్వంలో జెర్సీ అనే సినిమా చేయబోతున్నాడు నాని. ఇందులో లేటు వయసులో క్రికెటర్ గా రాణించే పాత్రలో నాని కనిపించబోతున్నాడు. ఇందులో నానిని మూడుదశల్లో చూపించబోతున్నాడు దర్శకుడు. టీనేజ్, యంగేజ్ తో పాటు 40ఏళ్లు దాటిన వ్యక్తిగా నాని కనిపించబోతున్నాడు.

టీనేజ్, యంగేజ్ క్యారెక్టర్స్ చేయడం నానికి కొత్తకాదు. గౌతమ్ మీనన్ దర్శకత్వంలో గతంలో ఓసారి ఈ తరహా పాత్రలు పోషించాడు. కానీ 40 ప్లస్ క్యారెక్టర్ మాత్రం ఇప్పటివరకు చేయలేదు. ప్రస్తుతం ఈ క్యారెక్టర్ కోసమే రీసెర్చ్ చేస్తున్నాడు నాని. ఓవైపు బిగ్ బాస్-2 చేస్తూనే, మరోవైపు దర్శకుడితో కలిసి లుక్ పై చిన్నపాటి పరిశోధన ప్రారంభించాడు. 

త్వరలోనే సెట్స్ పైకి రాబోతున్న ఈ సినిమాను సితార ఎంటర్ టైన్ మెంట్స్ బ్యానర్ పై నిర్మించబోతున్నారు. అజ్ఞాతవాసి తర్వాత అనిరుధ్ సంగీతం అందించబోతున్న సినిమా ఇదే.