Epaper
సౌత్ నుంచి వస్తున్న అతిభారీ ప్రాజెక్టుల్లో ఒకటిగా పేరుతెచ్చుకుంది సంఘమిత్ర. తేనాండాల్ ఫిలిమ్స్ బ్యానర్ పై సి.సుందర్ దర్శకత్వంలో సెట్స్ పైకి రావాల్సిన ఈ సినిమా రెగ్యులర్ షూటింగ్ కు ముందే అష్టకష్టాలు పడుతోంది. తాజాగా ఈ మూవీపై మరోసారి అనుమానాలు మొదలయ్యాయి.
ఈ నెలలో సెట్స్ పైకి వస్తుందనుకున్న సంఘమిత్ర సినిమా ఇప్పట్లో రాదని తేలిపోయింది. షూటింగ్ మాట దేవుడెరుగు, టోటల్ సినిమానే ఆగిపోయినట్టు టాక్. ప్రీ-ప్రొడక్షన్ వర్క్ కంప్లీట్ అవ్వలేదని యూనిట్ చెబుతున్నప్పటికీ.. సినిమా ఆగిపోయే అవకాశాలే ఎక్కువగా ఉన్నాయని తెలుస్తోంది. తాజాగా దీనికి సంబంధించి హీరోయిన్ దిశాపఠానీ చేసిన వ్యాఖ్యలు మరింత ప్రాధాన్యం సంతరించుకున్నాయి.
సౌత్ లో ఓ పెద్ద సినిమాకు ఓకే చెప్పాను కానీ ఆ ప్రాజెక్టు వర్కవుట్ అయ్యేలా కనిపించడం లేదని స్వయంగా దిశాపఠానీ ఓ కార్యక్రమంలో బయటపెట్టింది. నేరుగా సంఘమిత్ర పేరును ఆమె ప్రస్తావించలేదు కానీ దిశాకు సంబంధించి పెద్ద సౌత్ ప్రాజెక్టు అంటే అది సంఘమిత్ర మాత్రమే. ఆమె ప్రకటనతో ఈ సినిమాపై ఇప్పుడు మరిన్ని డౌట్స్ పెరిగాయి.
కేన్స్ ఫిలింఫెస్టివల్ లో గ్రాండ్ గా ఎనౌన్స్ చేశారు సంఘమిత్ర ప్రాజెక్టును. దాదాపు 300కోట్ల రూపాయల బడ్జెట్ అనుకున్నారు. శృతిహాసన్ ను హీరోయిన్ గా తీసుకున్నారు. కానీ స్క్రిప్ట్ బాగాలేదంటూ ఆమె తప్పుకోవడంతో ఆ స్థానంలో దిశాను తీసుకున్నారు. ఇప్పుడు ఈమె కూడా సినిమాపై అనుమానం కలిగేలా వ్యాఖ్యలు చేసింది.
మరోవైపు ఇందులో నటించబోయే హీరోలు ఆర్య, జయం రవి కూడా వేరే ప్రాజెక్టులతో బిజీ అయిపోయారు. ఇవన్నీ చూస్తుంటే సంఘమిత్ర ప్రాజెక్టు అగిపోయినట్టే కనిపిస్తోంది.