Epaper
ఈమధ్య ఎక్కువగా మధ్య శ్రేణి చిత్రాలని మాత్రమే నిర్మిస్తోన్న దిల్‌ రాజు మళ్లీ స్టార్‌ హీరోలతో వరుసగా సినిమాలు తీసే ప్రయత్నాల్లో వున్నాడు. అయితే స్టార్‌ డైరెక్టర్లు ఎవరూ దిల్‌ రాజుకి డేట్స్‌ ఇవ్వడం లేదు. అగ్ర హీరోలంతా టాప్‌ ర్యాంక్‌ డైరెక్టర్లతో మాత్రమే చేస్తోన్న ఈ టైమ్‌లో దిల్‌ రాజు దగ్గరున్న దర్శకులకి స్టార్ల నుంచి అపాయింట్‌మెంట్‌ కూడా దొరకడం లేదు.
ప్రతి సినిమాపై తన ముద్ర వుండాలంటూ తనతో పని చేసే దర్శకులకి ఫ్రీ హ్యాండ్‌ ఇవ్వడం లేదనే విమర్శలు దిల్‌ రాజుపై వస్తున్నాయి. దీంతో అతనితో వర్క్‌ చేయడానికి స్టార్‌ డైరెక్టర్లు ఆసక్తి చూపించడం లేదట. దానికి తోడు అతని సినిమాలు కూడా ప్రధానంగా మిడిల్‌ క్లాస్‌ హీరోలకే పరిమితం అవుతూ వుండడం కూడా స్టార్స్‌ డేట్స్‌ దొరక్కపోవడానికి కారణమట.
దిల్‌ రాజు బ్యానర్లో అగ్ర హీరోలు నటించిన చిత్రాలు అంత గొప్పగా ఆడిన దాఖలాలు కూడా లేవు. ఈ నమ్మకాన్ని మార్చి, మళ్లీ స్టార్‌ హీరోల దృష్టి తనవైపుకి తిప్పేట్టు చేస్తుందని మహేష్‌తో వంశీ పైడిపల్లి తీస్తోన్న చిత్రంపై దిల్‌ రాజు చాలానే ఆశ పెట్టుకున్నాడు. ఈ చిత్రానికి అశ్వనీదత్‌, పివిపి కూడా భాగస్వాములు అయినప్పటికీ దిల్‌ రాజు సినిమాగానే పరిగణిస్తున్నారు. స్టోరీ డిస్కషన్‌ నుంచి ఇప్పుడు ప్రొడక్షన్‌ వరకు మిగిలిన ఇద్దరు నిర్మాతల కంటే దిల్‌ రాజు యాక్టివ్‌గా వుంటున్నాడు.