ఆ బయోపిక్‌లో హీరో ఎఫైర్లు కూడా..?

సంజయ్ దత్ బయోపిక్ ఆసక్తిని రేపుతోంది. రణ్‌బీర్ కపూర్ సంజయ్‌దత్‌గా జీవించేసిన ఈ సినిమాకు సంబంధించిన ట్రైలర్‌తో ఫుల్ జోష్ వచ్చింది. ఈ సినిమాను సంజయ్ దత్ జీవితంలోని యథార్థ సంఘటనల ఆధారంగానే తీశారు.. అనే విషయంపై ట్రైలర్‌తో స్పష్టత వస్తోంది. ప్రత్యేకించి సంజయ్ దత్ జీవితాన్ని ఆ స్కాండల్‌గా అభివర్ణిస్తున్నారు ఈ సినిమా రూపకర్తలు. దీన్నిబట్టి వీరు అతిఅభిమానానికి పోయి అసలు విషయాన్ని చూపకుండా ఉండే టైపుకాదనే అభిప్రాయం కలుగుతోంది.

కాబట్టి సంజయ్ దత్ బయోపిక్‌ నుంచి కొన్ని వాస్తవాలను ఆశించవచ్చు అని స్పష్టం అవుతోంది. ఈ నేపథ్యంలో సంజయ్ దత్ వ్యక్తిగత వ్యవహారాలు కొన్ని చర్చనీయాంశంగా మారాయి. అందులో రసవత్తరమైనవి సంజయ్ నడిపిన ప్రేమకథలు. వ్యక్తిగత జీవితంలో ఎలాఉన్నా బాలీవుడ్‌లో స్టార్‌గా వెలుగొందిన సంజయ్ దత్ మాస్ ఫాలోయింగ్‌ను సంపాదించుకున్న హీరో. అలాగే హీరోయిన్లను పడేయడంలో కూడా ఇతడికి తిరుగులేదు.

దేశమంతా ఆరాధించిన మాధురీ దీక్షిత్‌తో ప్రేమాయణాన్ని నడిపిన వ్యక్తి ఇతడు. ఆమె మాత్రమే కాకుండా వేరే హీరోయిన్లతో కూడా సంజూబాబా ప్రేమాయణాలు నడిపిన దాఖలాలున్నాయి. ప్రస్తుతానికి అయితే వాటి గురించి మాట్లాడటానికి సంజూ ఇష్టపడడు. మాధురితో మళ్లీ నటిస్తున్న ఈ హీరో పాత ప్రేమకథ ఎత్తితే చిరాకుపడతాడు. ఇటీవలే ఆ చిరాకును బయటకు ప్రదర్శించాడు. దీంతో.. సంజూ బయోపిక్‌లో ఈ హీరో ప్రేమకథలు ఉంటాయా? అనేది ఆసక్తిదాయకమైన ప్రశ్నగా నిలుస్తోంది.

హిరానీ జోరు చూస్తుంటే మాత్రం.. అప్పట్లో దత్ నడిపిన ప్రేమ వ్యవహారాల గురించి కూడా సినిమాలో చూపించే ఉంటాడేమో అనే అంచనాలు ఉన్నాయి.