Epaper
నా పేరు సూర్య సినిమా విడుదల ఇంకో నెల రోజుల్లో వుంది. ఆ సినిమా గురించి ఇప్పటికి ఏం బయటకు వచ్చింది అంటే కండలు తిరిగిన రఫ్ ఫిజిక్ తో వున్న అల్లు అర్జున్ ఫోటో. నోట్లో ఓ సిగార్ అనబడే చుట్ట. అంతకు మించి ఏమన్నా వుందా? భంగిమ వన్.. భంగిమ టూ అంటే అదే, పదే పదే. భరత్ అనే నేను సినిమా వైవిధ్యమైన ప్రచారంతో, ప్లానింగ్ తో ముందుకు వెళ్తుంటే, నా పేరు సూర్య మాత్రం అడుగు, అడుగు వెనక్కు వేస్తున్నట్లు కనిపిస్తోంది.
సినిమా ఫస్ట్ లుక్ వదిలారు. ఆ తరువాత రంగస్థలం సినిమాకు దారి ఇచ్చేస్తున్నట్లు, త్యాగం చేస్తున్నట్లు ఫీలర్లు వదిలి ఊరుకున్నారు. ఆ తరువాత డైలాగ్ ఇంపాక్ట్ కోసం ఓ పిక్చర్ వదులుదామనుకుంటే, అది కాస్తా లీక్ అయిపోయింది. దాంతో ఇక మళ్లీ మామూలుగా వదిలేసారు. తీరా చూస్తే అది కూడా మొదట వదిలిన దానికి పెద్ద తేడాగా ఏమీ లేదు. అది జీపులో. ఇది బైక్ మీద. అదే లుక్. అదే సిగార్ కమ్ చుట్ట.
అసలే నాపేరు సూర్య సినిమాకు బజ్ రావడం లేదు. సినిమా సీరియస్ కథ, సీరియస్ వ్యవహారం కావడంతో, బన్నీ ఫ్యాన్స్ టెన్షన్ పడుతున్నారు. రామ్ చరణ్ రంగస్థలం బ్లాక్ బస్టర్ అయిపోయింది. ఇప్పుడు ఈ ఫిగర్స్ అన్నీ దాటుకుంటూ వచ్చేంత స్టామినా నాపేరు సూర్య చూపించాలి. కానీ అప్పటికే రంగస్థలం, భరత్ అనే నేను లాంటి రెండు పెద్ద సినిమాలు వచ్చేస్తాయి.
పైగా ఫ్యామిలీ ఆడియన్స్ కు కాస్త ఆసక్తి వున్న మహానటి సినిమా కూడా మే ఫస్ట్ వీక్ లోనే విడుదులవుతోంది. రంగస్థలం సినిమాకు దొరికినట్లు సోలో డేట్ దొరకడం లేదు. నాపేరు సూర్య విడుదలయ్యే నాటికి మల్టీ స్క్రీన్స్ లో రంగస్థలం వుంటుంది. భరత్ అనే నేను వుంటుంది. ఈ సినిమా విడుదలయిన కొద్ది రోజులకే మహానటి వస్తుంది. చిన్న సినిమా రాజుగాడు వస్తుంది.
ఎంటర్ టైన్ మెంట్ పార్ట్ కన్నా ఎమోషన్ పార్ట్ వున్న సినిమాకు ప్రమోషన్ అన్నది కీలకంగా వుండాలి. అది కూడా నావెల్ మెథడ్స్ లో వెళ్లాలి. కానీ నాపేరు సూర్య టీమ్ అలా వెళ్తున్నట్లు కనిపించడం లేదు. ఎంత సేపూ ఒకే స్టిల్ విడుదల చేయడంతో సరిపోతున్నట్లు కనిపిస్తోంది.