Epaper
అయిపోయిందనుకున్న కాజల్ కెరీర్ కు పవన్ కల్యాణ్ కొత్త ఊపునిస్తున్నాడు అనే అభిప్రాయాలు వినిపిస్తున్నా… 'సర్ధార్ గబ్బర్ సింగ్' లో నటించడం కాజల్ పూర్వ జన్మసుకృతం అని మరికొందరు చెబుతున్నా… ఈ సినిమాకు పవన్ కు మించి అట్రాక్షన్ అవుతోంది కాజల్ అగర్వాల్. ఈ అమ్మాయి నటించడమే ఈ సినిమా విడుదలకు కూడా ఒక కారణం అవుతోంది. మరి పవన్ ఇమేజ్ ముందు.. కాజల్ ఎంత? ఆమె మెయిన్ అట్రాక్షన్ కావడం ఏమిటి? అంటే.. ఇది తెలుగుకు సంబంధించిన వ్యవహారం కాదు.
పవర్ స్టార్ పవన్ కల్యాణ్ క్రియేటివ్ వర్క్స్ కు ప్రతి రూపంగా రూపొందుతున్న ఈ సినిమాను హిందీలో కూడా విడుదల చేయనున్నారు. బాలీవుడ్ సినిమాలను అమితంగా ఇష్టపడే పవన్ ఈ సినిమాను అక్కడ విడుదల చేయడాన్ని ప్రతిష్టాత్మకంగా తీసుకున్నాడు. ఇది వరకూ పవన్ సినిమాలు కొన్ని హిందీలోకి డబ్ అయ్యాయి. అయితే అవి తెలుగుతో పాటు హిందీలో విడుదల కాలేదు. టీవీ చానళ్ల వాళ్లు టైంపాస్ కోసం ఈ సినిమాలను హిందీలోకి డబ్ చేసుకున్నారు. వాటికి భిన్నంగా తెలుగు తో పాటే హిందీలో కూడా ఒకేసారి విడుదల కాబోతోంది సర్దార్ గబ్బర్ సింగ్. ఈ విడుదల విషయంలోనే కాజల్ గొప్పదనమేమిటో తెలుస్తోంది.
హిందీ జనాలకు పవన్ తో పెద్దగా పరిచయం లేదు. అయితే కాజల్ మాత్రం ఉత్తరాది భామే. అంతేగాక అక్షయ్ కుమార్ వంటి మాస్ ఇమేజ్ ఉన్న హీరోతో హిట్ ను కలిగి ఉంది ఈభామ. ఈరకంగా బాలీవుడ్ లో కాజల్ కు మంచి గుర్తింపే ఉంది. అదే ఇప్పుడు పవన్ సినిమాకు ఉపయోగపడుతోంది. పవన్ నటించిన సినిమాగా కాకుండా కాజల్ ముఖ్యపాత్రలో చేసిన సినిమాగా ఆమె గ్లామరే ప్లస్ పాయింట్ గా ఈ సినిమాకు హిందీలో అంతో ఇంతో గుర్తింపు లభిస్తోంది. మరి హిందీ వెర్షన్ వరకూ పవన్ సినిమాకు కాజల్ కేవలం హీరోయిన్ కాదు..హీరో కూడా!