ఎమ్బీయస్: జూలీ ఏండ్రూస్‌కు నప్పని సెక్సీ యిమేజ్!

జూలీ ఏండ్రూస్ పేరు చెప్పగానే ఆమెకు ఆస్కార్ తెచ్చిపెట్టిన ‘‘మేరీ పాపిన్స్’’ కొందరికి గుర్తు వస్తే మన భారతీయుల్లో చాలామందికి ‘‘సౌండ్ ఆఫ్ మ్యూజిక్’’ తారగా, గాయనిగా గుర్తుకు వస్తుంది. అల్లరిపిల్లలు కొంతమందిని పాటలతో మురిపించి, వారిని సన్మార్గంలో పెట్టి వాళ్ల గార్డియన్ మనసు దోచుకునే టీచరమ్మ థీమ్‌ను పాప్యులరైజ్ చేసిన సినిమా – “సౌండ్ ఆఫ్ మ్యూజిక్” (1965). భారతదేశంలో కూడా సూపర్ హిట్ అయిన ఈ సినిమాకు ప్రపంచమంతా ఆదరణ లభించింది. ఈ కథ ఇనిస్పిరేషన్‌తో వివిధ భాషల్లో అనేక వెర్షన్లు తయారయ్యాయి. అయితే కథకు నేపథ్యం మాత్రం మార్చుకోవలసి వచ్చింది. ఎందుకంటే అసలు కథకు రంగభూమి రెండో ప్రపంచ యుద్ధకాలంలోని ఆస్ట్రియా. మిలటరీ మనిపైన వాన్ ట్రాప్ కి బోల్డంత మంది పిల్లలు. భార్య పోయింది. పిల్లలు తండ్రి ముందు డిసిప్లిన్ నటించే రాలుగాయలు. వచ్చిన టీచర్లంతా పారిపోతూ ఉంటారు.

ఎవర్నయినా గవర్నెస్‌ను పంపమని ఓ చర్చిని కోరతాడు తండ్రి. అక్కడ మారియా అనే ఒక నన్ (క్రిస్టియన్ సన్యాసిని) చర్చిలో వాళ్లందరికీ తలకాయ నొప్పిగా ఉంటుంది. బొత్తిగా డిసిప్లిన్ లేకుండా, హాయిగా పాటలు పాడుకుంటూ ఉంటుంది. చర్చి వాళ్లు ఈ మారియాను వాన్ ట్రాప్ కుటుంబం మీదకు తోలతారు. ఆమె అక్కడ పిల్లలతో కలిసి అల్లరి చేస్తూ, వాళ్లకు సంగీతం నేర్పి వాళ్లను ఆకట్టుకుంటుంది. వాళ్లను చక్కగా తీర్చిదిద్దుతుంది. తండ్రి చాలా ఇంప్రెస్ అవుతాడు. మారియాను పెళ్లాడతాడు. కథ ఇక్కడతో ఆగిపోతే డ్రామా ఉండేది కాదేమో, అందువల్ల యుద్ధప్రభావం కూడా చేర్చారు.

ఆ సమయంలో హిట్లర్ సారథ్యంలో నాజీలు ఆస్ట్రియాను ఆక్రమిస్తారు. మిలటరీ మనిషైన వాన్ ట్రాప్‌ను నాజీ సైన్యంలో చేరమని ఒత్తిడి చేస్తారు. పొరుగున ఉన్న స్విజర్లాండ్ పారిపోతే, అది తటస్థరాజ్యం కాబట్టి ఇబ్బంది ఉండదు. మరి మిలటరీ కాపలా నుండి పారిపోవడం ఎలా? దానికీ సంగీతమే అక్కరకు వస్తుంది. ఊరిలో ఏర్పాటు చేసిన సంగీత సభలో వాన్ ట్రాప్ కుటుంబం మొత్తం పాడుతూ, పాడుతూ చీకటిలో కనుమరుగయి పోతారు. మిలటరీ వాళ్ల కన్నుగప్పి స్విజర్లండ్ చేరతారు. మరి మన భాషల్లో తీసినప్పుడు యుద్ధసన్నివేశం అతకదు కదా!

అందువల్ల తమిళ సినిమా “శాంతినిలయం” (1969 – కాంచన, జెమినీ గణేశన్) తీసినప్పుడు హీరోకు మొదటి భార్య ఉన్నట్టు, ఆమె భూతంలా తిరుగుతున్నట్టు కాస్త డ్రామా పెట్టారు. దీన్ని “తల్లిని మించిన తల్లి” పేరుతో తెలుగులోకి డబ్ చేశారు. హిందీలో వచ్చేసరికి గుల్జార్ “పరిచయ్” (1972) తీస్తూ పిల్లలు తాతగారి సంరక్షణలో పెరిగినట్టు మార్చారు. అతనికి, పిల్లల తండ్రికి గల అభిప్రాయభేదాల ద్వారా నాటకీయత సృష్టించారు. టీచరు అమ్మాయి కాదు, అబ్బాయి (జితేంద్ర). పిల్లలలో పెద్దమ్మాయి (జయబాధురి)ని పెళ్లాడతాడు. తెలుగులో “రావుగారిల్లు” (1988) కూడా “సౌండ్ ఆఫ్ మ్యూజిక్” వల్ల ఇన్‌స్పయిర్ అయినదే!

“సౌండ్ ఆఫ్ మ్యూజిక్” పాటల గురించి సంగీతప్రియులకు వేరే చెప్పనవసరం లేదు. ‘డో రే మీ’ ను “ఆదర్శకుటుంబం” (1969) లో వాడుకున్నారు. ఆ పాటకు దీటుగా గుల్జార్ ‘సారేకే సారే గామాకో లేకర్..’ అని “పరిచయ్” లో చక్కటి పాట రాశారు. ‘‘సౌండ్ ఆఫ్ మ్యూజిక్’’ సినిమాలో హీరో క్రిస్టఫర్ ప్లమ్మర్ కంటె జూలీ ఏండ్రూస్‌కు ఎక్కువ పేరు వచ్చింది. ఈ సినిమా రిలీజైన ముందు ఏడాదే ఆమెకు “మేరీ పాపిన్స్” (1964) హీరోయిన్‌గా ఆస్కార్ వచ్చింది. దీనికి నామినేషన్ వచ్చింది. ఈ సినిమాలో చిన్న పిల్లలతో బాటు సమానంగా ఆడి, పాడి అందర్నీ అలరింపజేసిన గవర్నెస్‌గా ఆమె వేసిన పాత్రకు పూర్తి న్యాయం చేకూరిందంటే దానికి కారణం – ఆ పాత్ర ఆమెకు చక్కగా సూటవడం, అంతకంటే చక్కగా పాడగలగడం!

ఈ సినిమా ఆమె వ్యక్తిగత జీవితంపై కూడా ప్రభావం చూపించింది. స్టేజ్ నటీమణిగా జీవితం ప్రారంభించిన ఆమె తన 24వ ఏట 1959లో సెట్ డిజైనర్ టోనీ వాల్టన్‌ను పెళ్లాడింది. 1962లో వారికి కూతురు పుట్టింది. ‘‘మేరీ పాపిన్స్’’, ‘‘సౌండ్ ఆఫ్ మ్యూజిక్’’ అద్భుతంగా విజయం సాధించడంతో వారిద్దరి మధ్య పొరపొచ్చాలు వచ్చాయి. రాక్ హడ్సన్ హీరోగా నటించిన మ్యూజికల్‌కు దర్శకత్వం వహించిన “డార్లింగ్ లిలీ” (1970) సినిమా నిర్మాణం ప్రారంభించినపుడు 1967లో ఆ సినిమా రచయిత, డైరక్టర్ బ్లేక్ ఎడ్వర్డ్స్‌తో సాన్నిహిత్యం ఏర్పడింది. 1968లో వాల్టన్‌కు విడాకులు యిచ్చి, 1969లో ఎడ్వర్డ్స్‌ను పెళ్లాడింది.

అంతకు ముందు ఆమె నటించిన “ది అమెరికనైజేషన్ ఆఫ్ ఎమిలీ” (1964), “హవాయీ” (1966) చిత్రాలు మంచి పేరే తెచ్చిపెట్టాయి. ఆల్‌ఫ్రెడ్ హిచ్‌కాక్ దర్శకత్వంలో చేసిన “టోర్న్ కర్టెన్” (1966) నిరాశనే మిగిల్చింది కానీ మ్యూజికల్ కామెడీ “థరోలీ మోడర్న్ మిల్లీ” (1967) బాగా హిట్ అయింది. ఆ తర్వాతి ఏడాది “సౌండ్ ఆఫ్ మ్యూజిక్” వంటి గొప్ప హిట్ ఇచ్చిన రాబర్ట్ వైజ్ దర్శకత్వంలో “ది స్టార్” (1968) అనే సినిమా చేస్తే అది దెబ్బతింది. జెర్‌ట్రూడ్ లారెన్స్ అనే రంగస్థల నటి జీవితం ఆధారంగా తీసిన ఈ సినిమాలో ఎంత ప్రయత్నించినా జూలీ ప్రాణం పోయలేకపోయింది.

ఎడ్వర్డ్స్ మ్యూజికల్స్, కామెడీలు తీయడంలో సిద్ధహస్తుడు. పీటర్ సెల్లర్స్ వేసిన ‘‘పింక్ పాంథర్’’ సీరీస్ అతను డైరక్ట్ చేసినవే. జూలీ యితరుల సినిమాల్లో కూడా నటిస్తూ ఉండేది. జూలీని పెళ్లాడాక ఎడ్వర్డ్స్ ఆమె హీరోయిన్‌గా, ఒమార్ షెరీఫ్ హీరోగా ‘‘ద టామరిండ్ సీడ్’’ (1974) పేర రొమాంటిక్ సస్పెన్స్ థ్రిల్లర్ తీస్తే అది బాగానే ఆడింది. దీని తర్వాత ‘‘10’’ (1979) అనే రొమాంటిక్ కామెడీలో జూలీని కాస్త స్పయిసీగా చూపించాడు. అది బాగా ఆడింది. వేరే వారి దర్శకత్వంలో జూలీ వేసిన కామెడీ “లిటిల్ మిస్ మార్కర్” (1980) ఓ మాదిరిగా ఆడింది. తనకు ఎంత ప్రతిభ ఉన్నా, ఎన్ని సినిమాల్లో రకరకాల వేషాలు వేసినా, “మేరీ పాపిన్స్”లో చూపిన గవర్నెస్ వంటి సాఫ్ట్ ఇమేజి ఆమె కెరియర్ మొత్తం వెంటనంటి వుండటం ఆమె భర్తకి నచ్చలేదు. ఆ ఇమేజి తుడిపివేసి, ఒక బోల్డ్ యిమేజి యివ్వడానికి అతను “S.O.B.” (1981) సినిమాను ప్లాన్ చేశాడు. హాలీవుడ్ మీద సెటైర్‌గా తీసిన ఆ సినిమాలో ఓ ప్రొడ్యూసరు ఫెయిలయిన తన సినిమాకు మసాలా చేర్చి రీరిలీజ్ చేయాలని హీరోయిన్ (అతని భార్య కూడా) చేత నగ్న దృశ్యాలు నటింప జేసి కొత్తగా చేరుస్తాడు. ఆ భార్య పాత్రను జూలీకి యిచ్చాడు.

జూలీ ఎంత గొప్ప నటి ఐనా, ఆమెకు గొప్పగా అందగత్తెగా, రొమాంటిక్‌ ఫిగర్‌గా యిమేజి లేదు. “మై ఫెయిర్ లేడీ” నాటకాన్ని స్టేజి మీద ప్రదర్శించినప్పుడు హీరోయిన్ మిస్ డూలిటిల్ పాత్రను జూలీ ఆండ్రూయే వేసినా 1964లో దాన్ని సినిమాగా తీద్దామనుకున్నపుడు ఆమెను తీసుకోలేదు. ఆ పాత్రకు జూలీ అందం సరిపోదనుకుని పాట పాడడం రాకపోయినా ఫర్వాలేదని ఆడ్రీ హెప్‌బర్న్‌ని తీసుకున్నారు. ఈ సినిమా తర్వాత ఎడ్వర్డ్ దర్శకత్వంలోనే వచ్చి విజయవంతమైన కామెడీ “విక్టర్/విక్టోరియా” (1982) సినిమాలలో ఆమె చాలాసేపు మగవాడి వేషంలో కనబడుతుంది. అది ఎంత బాగా నప్పిందంటే దానికి ఆస్కార్ నామినేషన్ లభించింది. అలాటి జూలీని 46 ఏళ్ల వయసులో యీ సినిమాలో ఎడ్వర్డ్స్ టాప్‌లెస్‌గా చూపించాడు. ‘ఏదో క్యూరియాసిటీ కొద్దీ వచ్చి చూస్తారేమో, ఆమె ఛాతీని నగ్నంగా చూస్తే ఆశాభంగం చెంది చాలా నిరాశ పడతారు. జాగ్రత్త!’ అని హెచ్చరించాడు ఒక సమీక్షకుడు. సినిమా ఫెయిలయింది.

ఈ తరం నటీనటులు కూడా గమనించవలసిన అంశమిది. చాక్‌లెట్ బోయ్ యిమేజి ఉన్న హీరో రఫ్ అండ్ టఫ్ యిమేజితో యాక్షన్ సినిమాలో వేయాలనే తపనతో బూచాడిలా తయారైతే ప్రేక్షకులు చీదరించుకుంటారు. అలాగే సంసారపక్షంగా ఉన్న హీరోయిన్ అంగప్రదర్శన చేసినా తిరస్కరిస్తారు. ఇది గ్రహించక జూలీ, ఆమె భర్త వేసిన కాలిక్యులేషన్ తప్పింది. దీని తర్వాత జూలీ “ద మాన్ హూ లవ్డ్ విమెన్” (1983), “డ్యూయెట్ ఫర్ వన్” (1986), “దట్స్ లైఫ్” (1986) యిత్యాది సినిమాలు వేసింది. కాస్త విశ్రాంతి తీసుకుని 1992లో “జూలీ” అనే టీవీ సిట్‌కామ్‌లో నటిస్తే అదీ పెద్దగా ప్రజాదరణ పొందలేదు. అదే సంవత్సరంలో వచ్చిన “ఎ ఫైన్ రొమాన్స్” కూడా అంతంత మాత్రంగానే నడిచింది. తెరజీవితం ఇక చాలనుకున్న జూలీ ఆండ్రూస్ నేషనల్ కాన్సర్ట్ ట్రూప్ లో చేరి కచ్చేరీలు యిస్తూ కాలక్షేపం చేసింది. పుస్తకాలు కూడా రాసింది. ఎడ్వర్డ్స్‌తో ఆమె వైవాహిక జీవితం 41 ఏళ్లు, అంటే 2010లో అతను మరణించే వరకు సాగింది. ఇప్పుడామె వయసు 89. – (ఫోటో ‘‘సౌండ్ ఆఫ్ మ్యూజిక్’’. ‘‘ఎస్‌ఓబి’’)

– ఎమ్బీయస్ ప్రసాద్

mbsprasad@gmail.com