cloudfront

Advertisement

Advertisement


Home > Movies - Movie Gossip

14 రీల్స్ డిమాండ్ కు తలొగ్గిన మహేష్?

14 రీల్స్ డిమాండ్ కు తలొగ్గిన మహేష్?

ఎంత సూపర్ స్టార్ అయినా నిర్మాతలు సరిగ్గా పట్టుకుంటే తలొగ్గాల్సిందే. మహేష్ బాబు సినిమా వ్యవహారం ఇలాగే తయారయినట్లు వార్తలు వినిపిస్తున్నాయి. పరుశురామ్ తో సినిమా చేయాలని మహేష్ బాబు అనుకున్నారు. ఆ సినిమాను మైత్రీ మూవీస్ కు ఇవ్వాలని మహేష్ వ్యవహారాలు చక్కదిద్దే నమ్రత అనుకున్నట్లు వార్తలు ఆ మధ్య వినవచ్చాయి. కానీ అక్కడే సమస్య వచ్చింది.

అప్పటికే పరుశురామ్ ఓ సినిమాను 14రీల్స్ కు కమిట్ అయి, అనౌన్స్ మెంట్ కూడా ఇచ్చేసారు. తమ అడ్వాన్స్ మేరకు తమకు సినిమా చేయాల్సిందే అని మైత్రీ మూవీస్, తమను వదిలి ఎలా వెళ్తారని 14రీల్స్ పట్టుకుని కూర్చున్నాయి.

ఈ విషయంలో 14రీల్స్ తెలివిగా, పైకి ఏమీ మాట్లాడకుండా, డైరక్టర్ ను నొక్కిపెట్టి కూర్చుంది. మైత్రీ మూవీస్ ఎంత ప్రయత్నించినా వ్యవహారం ముందుకు సాగడం లేదు. టైమ్ గడచిపోతోంది. ఈలోగా ఈ కరోనా గొడవ వచ్చి పడింది. 

ఇప్పుడు ఏదో ఒకటి తేల్చుకుంటే తప్ప, ముందుగా అనుకున్నట్లు మే లేదా జూన్ నుంచి మహేష్ కొత్త సినిమాను ప్రారంభించడం సాధ్యం కాదు. అందుకే ఇంక ఈ పంచాయతీ తెగేలా లేదని, 14రీల్స్ కు, మైత్రీకి కలిపి సినిమా చేయాలని మహేష్ డిసైడ్ అయినట్లు వార్తలు వినవస్తున్నాయి. ఇదే నిజమైతే మొత్తం మీద 14రీల్స్ సంస్థ తన పంతం నెగ్గించుకున్నట్లే, ఈ విషయంలో మైత్రీ వైపు నిల్చున్న నమ్రత మాట చెల్లనట్లే అన్న కామెంట్ లు ఇండస్ట్రీలో వినిపిస్తున్నాయి.

కానీ ఒకటెే అనుమానం. ఇప్పుడు తన కొడుకు సినిమాను ఆపేస్తే, హీరో నాగార్జున 14 రీల్స్ పట్ల ఎలా ఫీల్ అవుతారన్నదే?