Epaper
గత ఏడాది సంక్రాంతి బరిలో నిలిచిన ఒక తమిళ సినిమా టాలీవుడ్ మూవీ మేకర్లను కూడా వణికించింది. అదే “ఐ''. శంకర్ దర్శకత్వంలో విక్రమ్ హీరోగా రూపొందించిన ఈ తమిళ సినిమాను తెలుగులోకి అదే పేరుతో డబ్ చేశారు. ఈ సినిమా భారీ తనానికి తెలుగు వాళ్లు భయపడిపోయారు! సంక్రాంతి వంటి పండగ సీజన్ ఉన్నప్పటికీ ఐ వస్తోందంటూ… కొన్ని సినిమాలు పక్కకు జరిగాయి. పవన్ కల్యాణ్ సినిమా 'గోపాలా గోపాలా' వంటి మాత్రమే 'ఐ' ని ఢీ కొట్టగలిగాయి. మరి 'ఐ' ని తగలడానికి తెలుగులోనే కొన్ని సినిమాలు వెనుకడుగు వేయగా.. విశాల్ మాత్రం చాలా ధైర్యంగా తన సినిమాను పొంగల్ సీజన్ లో విడుదల చేశాడు.
గత పొంగల్ లో “ఆంబలా'' (తెలుగులో మగమహరాజు) పేరుతో రూపొందిన ఆ సినిమా పొంగల్ సీజన్ లో విక్రమ్ సినిమాను ఎదుర్కొంది. విశేషం ఏమిటంటే.. తమిళంలో 'ఐ' ప్లాఫ్ కాగా, విశాల్ సినిమా మాత్రం కమర్షియల్ గా సక్సెస్ అయ్యింది. మరి గత సంక్రాంతికి అలా మగమహరాజుగా నిలిచిన విశాల్ .. వచ్చే సంక్రాంతికి కూడా మరో సినిమాతో రెడీ అయ్యాడు!
ఈ సారి తెలుగు లో విపరీతమైన పోటీ మధ్య పెద్ద హీరోల సినిమాలతో పాటు విశాల్ సినిమా విడుదల కానుంది. 'కథకళి' పేరుతో తమిళంలో రూపొందిన ఆ సినిమాను తెలుగులోకి డబ్ చేసి సంక్రాంతికి విడుదల చేయనున్నారు. ఈ సినిమాకు విశాల్ నిర్మాత కూడా. మరి తెలుగులో సంక్రాంతి సీజన్ కు ఉన్న పోటీ ఏమిటో వేరే వివరించనక్కర్లేదు.
బాలయ్య, ఎన్టీఆర్, నాగార్జునలతో పాటు.. శర్వానంద్ వంటి చోటా స్టార్లతో పాటు.. మరో డబ్బింగ్ బొమ్మ సూర్య “24'' లు పోటీలో ఉన్నాయి. వాటికి తోడు విశాల్ కూడా తన సినిమాతో రెడీ అయిపోతున్నాడు. మరి గత ఏడాది తమిళనాడులో సాహసం చేసి విజయం సాధించిన విశాల్ కు ఈ సారి కూడా ఆ దైర్యమే తెలుగులో పెద్ద సినిమాల మధ్య మినిమం కలెక్షన్లనైనా తెచ్చిపెడుతుందేమో చూడాలి!