ఎల్లుండి నుంచి పనిలోకి.. అన్నీ రీషూట్లే

రారండోయ్ వేడుక చూద్దాం సినిమా రిలీజైన మూడో రోజు నుంచే వెకేషన్ కు వెళ్లిపోయాడు నాగార్జున. పనిలో పనిగా తన 25వ వివాహ వార్షికోత్సవాన్ని కూడా ఘనంగా సెలబ్రేట్ చేసుకున్నాడు. అలా ఫుల్ గా రీఫ్రెష్ అయిన నాగార్జున తిరిగి హైదరాబాద్ వచ్చాడు. ఎల్లుండి నుంచి తన కొత్త సినిమా పని మొదలుపెట్టబోతున్నాడు.

ప్రస్తుతం ఓంకార్ దర్శకత్వంలో రాజుగారిగది-2 సినిమా చేస్తున్నాడు నాగ్. ఈ మూవీ షూటింగ్ దాదాపు కంప్లీట్ అయిపోయిందని, రష్ అంతా ఓసారి చూసుకొని మళ్లీ సెట్స్ పైకి వస్తామని ఇప్పటికే ప్రకటించాడు. అనుకున్నట్టుగానే రాజుగారి గది-2 సినిమాకు సంబంధించి రఫ్ ఎడిటింగ్ పూర్తయింది. అది ఒకసారి చూసి ఎక్కడెక్కడ రీషూట్లు చేయాలో నిర్ణయించుకున్న తర్వాత సెట్స్ పైకి వెళ్తారు.

రాజుగారి గది-2 సినిమాలో సీరత్ కపూర్ హీరోయిన్ గా నటిస్తోంది. నాగ్ కాబోయే కోడలు సమంత మరో కీలక పాత్రలో కనిపించనుంది. అవసరమైతే రీషూట్ కు రెడీగా ఉండాలని వీళ్లిద్దరికీ ఇప్పటికే సమాచారం అందింది. ఈ మూవీతో పాటు అఖిల్ హీరోగా నిర్మిస్తున్న సినిమాపై కూడా దృష్టిపెడతాడు నాగ్.

అటు కల్యాణ్ కృష్ణతో చేయాల్సిన బంగార్రాజు ప్రాజెక్టును కూడా ఈసారి ఓ కొలిక్కి తీసుకొచ్చే ఆలోచనలో ఉన్నాడు నాగ్. కల్యాణ్ కృష్ణ నాగ్ తోనే కొనసాగుతాడా, లేక బయట నిర్మాతతో సినిమా చేస్తాడా అనే విషయం ఈసారి తేలిపోతుంది.