నిజం.. ‘కబాలి’ వచ్చేస్తున్నాడు.!

కొత్తగా 'కబాలి' వచ్చేయడమేంటి.? ఆల్రెడీ 'కబాలి' విడుదలైపోతేనూ.! కానీ, ఇక్కడ మేటర్‌ అది కాదు. 'కబాలి' ప్రమోషన్‌ కోసం తమిళ సూపర్‌ స్టార్‌ రజనీకాంత్‌ రంగంలోకి దిగుతున్నాడు. తన ఆరోగ్యంపై వస్తున్న పుకార్లను ఖండిస్తూ, 'కబాలి' సినిమా విజయవంతమైందంటూ మీడియాకి ఓ ప్రకటన విడుదల చేసిన రజనీకాంత్‌, సినిమా ప్రమోషన్‌ బాధ్యతల్ని తన భుజానికి ఎత్తుకోనున్నాడట. 

నిర్మాత కలైపులి ఎస్‌ థాను, రజనీకాంత్‌ కోసం ప్రత్యేకంగా ప్రమోషన్‌ ఏర్పాట్లు చేస్తున్నాడు. చెన్నయ్‌, హైద్రాబాద్‌, ముంబైతోపాటు విదేశాల్లోనూ రజనీకాంత్‌తో ప్రెస్‌మీట్స్‌ పెట్టించనున్నారట. సినిమా తేలిపోయిందనీ, వసూళ్ళు అటకెక్కాయనీ ఓ పక్క ట్రేడ్‌ రిపోర్ట్స్‌ వస్తోంటే, ఆ రిపోర్ట్స్‌ని ఖండించేస్తూ, సినిమా ఘనవిజయం సాధించేసిందని కలైపులి థాను ప్రకటనలు గుప్పించేస్తుండడం గమనార్హం. 

మరోపక్క, అమెరికాలో వున్నప్పుడే సినిమా విడుదలైందనీ, అక్కడే 'కబాలి'కి సూపర్‌ హిట్‌ టాక్‌ వచ్చిందనీ, ఇక్కడికి వచ్చాక సినిమా విజయవంతమైందన్న వార్తలు తనకు చాలా ఆనందం కలిగించాయని రజనీకాంత్‌ చెబుతుండడంతో, సినిమాని ఎలాగైనా గట్టెక్కించేందుకే అటు కలైపులి థాను, ఇటు రజనీకాంత్‌ నడుం బిగించారనే విషయం అర్థమవుతోంది. మరి, రజనీకాంత్‌ 'కబాలి' కోసం చేయబోయే ప్రమోషన్స్‌, సినిమా వసూళ్ళపై ప్రభావం చూపుతాయా.? వేచి చూడాల్సిందే.