నితిన్‌ని వెనక్కి లాగేసిన ‘లై’

వరుస విజయాలతో దూసుకుపోతూ, 'అ ఆ'తో తన స్థాయికి డబుల్‌ విజయాన్ని అందుకున్న నితిన్‌కి ఊహించని ఎదురుదెబ్బ తగిలింది. 'లై'తో పెరిగిన తన మార్కెట్‌ స్టేబుల్‌ చేసుకోవాలని చూసిన నితిన్‌ ప్లాన్స్‌ దారుణంగా దెబ్బ తిన్నాయి. మరో రెండు సినిమాలతో పోటీ పడ్డ ఈ చిత్రానికి బాక్సాఫీస్‌ వద్ద ఘోరమైన తిరస్కారం ఎదురైంది.

నితిన్‌ సినిమాల్లోనే అతి పెద్ద పరాజయం దిశగా లై పయనిస్తోంది. వారం తిరగకుండా జిల్లా వ్యాప్తంగా డే డెఫిసిట్స్‌ చాలా ప్రాంతాల్లో పడడంతో ఇక ఈ చిత్రం పుంజుకునే అవకాశాలు లేవని తేలిపోయింది. కొత్త సినిమాల సందడి ముగిసాక నెమ్మదిగా ఊపందుకుంటుందని నితిన్‌ ఆశించాడు కానీ ఆ దాఖలాలేమీ కనిపించకుండా పోయాయి.

నాని, నాగ చైతన్య, శర్వానంద్‌లాంటి హీరోలు నిలకడగా విజయాలు సాధిస్తోన్న దశలో, వరుణ్‌ తేజ్‌లాంటి హీరోలు దూసుకొచ్చిన తరుణంలో నితిన్‌ శ్రేణి హీరోల మధ్య పోటీ తీవ్రంగా వుంది.

అసలే కథలు అలవోకగా చేతులు మారిపోతున్న సమయంలో నితిన్‌కి రాకూడని పెద్ద ఫెయిల్యూర్‌ లై రూపంలో వచ్చింది. డీ మోరలైజ్‌ చేసే ఈ స్థాయి ఫెయిల్యూర్‌ నుంచి నితిన్‌ ఎంత త్వరగా కోలుకుని ఎంత వేగంగా తిరిగి ట్రాక్‌ ఎక్కితే అంత మంచిది. గుడ్‌ లక్‌ నితిన్‌.