Epaper
మైత్రీ మూవీస్ సంస్థ సినిమాలు భలే చమక్కుల్లో చిక్కుకుంటున్నాయి. రెండు సినిమాలు బ్యాక్ టు బ్యాక్ చకచకా తీసిన ఆ సంస్థ, అన్ని విధాల బలం, బలగం వుండి కూడా, హీరోలు, డైరక్టర్ల పుణ్యమా అని సినిమాలు ఫాస్ట్ గా అందించలేకపోతోంది. రంగస్థలం సినిమాను ఎప్పటి నుంచో చెక్కుతున్నారు దర్శకుడు సుకుమార్. ఆ సినిమా ఇఫ్పటికీ ఇంకా ఇరవై రోజుల పని బకాయిలోవుంది. అయితే ఇక పూర్తయిపోవడం పక్కా అన్న స్టేజ్ కు వచ్చింది.
పవన్ కళ్యాణ్ తో సినిమా అన్నది ఎప్పటి నుంచో డిస్కషన్ లో వుంది. తమిళ సినిమా కొని, సెకండాఫ్ మొత్తం మార్పించి, కొత్తగా స్క్రిప్ట్ చేయించారు. సంతోష్ శ్రీనివాస్ డైరక్టర్. కానీ లేటెస్ట్ గా వినిపిస్తున్న గుసగుస ఏమిటంటే, సంతోష్ శ్రీనివాస్ ను పక్కన పెట్టే ఆలోచనలు సాగుతున్నాయని? అసలు, ఆ స్క్రిప్ట్, ఆ డైరక్టర్, ఆ ప్రాజెక్టు ను పక్కన పెట్టి వేరే ఆలోచనలు చేస్తున్నట్లు తెలుస్తోంది.
మైత్రీ దగ్గర బోయపాటి డేట్లు కూడా వున్నాయి. రామ్ చరణ్ తో బోయపాటి సినిమా తరువాత కుదిరితే పవన్ తో సినిమా చేయిస్తే ఎలా వుంటుందన్న ఆలోచనలు సాగుతున్నట్లు తెలుస్తోంది. వాస్తవానికి బోయపాటి ఇప్పుడు చేయబోయే చరణ్ సినిమా తరువాత బాలయ్య సినిమా చేయాలి. ఆ విషయాన్ని ఆయనే స్వయంగా ప్రకటించారు కూడా. పైగా ఎన్నికల ముందు బాలయ్యతో బోయపాటి సినిమా అన్నది ఎప్పటి నుంచో వినిపిస్తున్న మాట.
మరోపక్క బోయపాటిని మహేష్ బాబుతో కలిపించి, లైన్ చెప్పించింది 14రీల్స్ సంస్థ. ఆ కాంబినేషన్ సెట్ చేయాలని కూడా ప్రయత్నాలు జరుగుతున్నాయి. మరి ఇలాంటి నేపథ్యంలో పవన్ తో బోయపాటి సినిమా చేస్తారా? అన్నది అనుమానం.
పైగా పవన్ తో సినిమా అంటే ఏ డైరక్టర్ అయినా ఇబ్బందులు పడాల్సిందే అన్న టాక్ మరింత బలంగా వినిపిస్తోంది. ఆయన షూట్ కు ఎప్పుడు వస్తారో? అసలు వస్తారో? రారో? మూడ్ లేదంటారో? ఇలా చాలా సమస్యలు వున్నాయని బలమైన గుసగుసలు వున్నాయి. త్రివిక్రమ్ లాంటి సన్నిహితుడే అజ్ఞాతవాసి టైమ్ లో చాలా ఇబ్బందులు పడ్డారని వార్తలు వున్నాయి. మరి ఇవన్నీ తెలిసి, బాలయ్యను కాదని, బోయపాటి అటు వెళ్తారా? అన్నది అనుమానమే.