Epaper
స్టార్ హీరోలతో సినిమాలకు డేట్లు సంపాదించడం మురుగదాస్‌కు పెద్ద కష్టం కావడం లేదు. ఇతడు తీసే సినిమాల్లో సగం ఫ్లాపులు ఉంటున్నా.. అవి డిజాస్టర్లుగా మిగులుతున్నా పెద్ద హీరోల డేట్లనయితే సంపాదించగలుగుతున్నాడు. మహేశ్ బాబుతో డిజాస్టర్ ‘స్పైడర్’ తర్వాత మురుగ చేస్తున్నది విజయ్ సినిమా.
విజయ్ తో ఈ దర్శకుడికి ఇది వరకూ కూడా హిట్స్ కొట్టిన నేపథ్యం ఉంది. కాబట్టి.. మళ్లీ విజయ్ అవకాశం ఇచ్చినట్టుగా ఉన్నాడు. అదలా ఉంటే.. మరో లీక్ ఇచ్చాడు మురుగ. సూపర్ స్టార్‌తో సినిమా చేసే ఆలోచన ఉన్నట్టుగా, ఆ ప్రయత్నంలో ఉన్నట్టుగా దాస్ ప్రకటించాడు. ప్రస్తుతం రజనీకాంత్ కార్తిక్ సుబ్బరాజ్ దర్శకత్వంలో రూపొందుతున్న సినిమాతో బిజీగా ఉన్నాడు.
ప్రస్తుతం ఈ సినిమా షూటింగులో ఉన్నాడు రజనీ. ఇక ‘కాలా’ డిజాస్టరై కూర్చుంది. ఈ సందర్భంగా రజనీ సినిమాలకు ఇక కాలం చెల్లిపోయిందేమో అని కూడా కొంతమంది అంటున్నారు. మరోవైపు రజనీకాంత్ సినిమాల్లో నటించడం ఆపేస్తే బాగుంటుందని ఆయన కూతురు కూడా అంటోంది. సినిమాల్లోనే మొహం మొత్తినట్టుగా కనిపిస్తున్న రజనీకాంత్ రాజకీయాల్లో అయినా సక్సెస్ అవుతాడా? అనేది మరో సందేహం.
రజనీకాంత్ తీరును చూస్తుంటే.. వద్దు అనిపించుకునేంత వరకూ సినిమాలను చేసేలా ఉన్నాడు. రోబో 2ఫలితాన్ని బట్టి రజనీకాంత్ తదుపరి కెరీర్ ఆధారపడి ఉందని చెప్పవచ్చు. ఆ సినిమా రోబో తరహా విజయం సాధిస్తే.. మంచి కథతో వస్తే రజీనిని యాక్సెప్ట్ చేస్తున్నట్టే లెక్క. లేకపోతే ఇంతే సంగతులు చిత్తగించవలెను అనుకోవాల్సి ఉంటుంది. ఆలోపే రజనీకాంత్ మురుగదాస్‌తో సినిమాను ఓకే చేస్తాడేమో!