ఫ్యామిలీ చిత్రాల దర్శకుడితో రవితేజ

నాగార్జునతో సోగ్గాడే చిన్ని నాయనా, నాగచైతన్యతో రారండోయ్ వేడుక చూద్దాం లాంటి పక్కా ఫ్యామిలీ ఎంటర్ టైనర్లు తెరకెక్కించాడు కల్యాణ్ కృష్ణ. ఇలాంటి దర్శకుడు రవితేజ కోసం ఓ కథ రాశాడంటే అది కచ్చితంగా ఇంట్రెస్టింగ్ పాయింటే. అవును.. రవితేజకు ఓ స్టోరీలైన్ వినిపించాడు కల్యాణ్ కృష్ణ.

ప్రస్తుతానికైతే రవితేజ, కల్యాణ్ కృష్ణ మధ్య చర్చలు జరుగుతున్నాయి. స్టోరీలైన్ రవితేజకు నచ్చింది. ఏ కథకైనా తనదైన స్టయిల్ లో మార్పుచేర్పులు చేయడం రవితేజకు అలవాటే. ఇక్కడ కూడా ఈ హీరో అదే పని చేశాడు. ఇదొక విలేజ్ బ్యాక్ డ్రాప్ స్టోరీ.

ఇక్కడ ఇంట్రెస్టింగ్ పాయింట్ ఏంటంటే.. ఈ కథ కూడా మరో హీరో దగ్గరకెళ్లి రవితేజ చెంతకు చేరింది. ఇంతకుముందు వెంకటేష్ కు వినిపించిన స్టోరీలైన్ నే ఇప్పుడు రవితేజకు చెప్పాడట కల్యాణ్ కృష్ణ. ఆ స్టోరీకే రవితేజ గ్రీన్ సిగ్నల్ ఇచ్చినట్టు తెలుస్తోంది.

గతంలో రాజా ది గ్రేట్ విషయంలో కూడా ఇలానే జరిగింది. రామ్ ఆ స్టోరీని రిజెక్ట్ చేశాడు. ఎన్టీఆర్ సగం మాత్రమే విన్నాడు. అలాంటి కథతో హిట్ కొట్టాడు రవితేజ. ఇప్పుడు కల్యాణ్ కృష్ణ స్క్రిప్ట్ కూడా వెంకటేష్ మీదుగా రవితేజ వద్దకొచ్చింది.