Epaper
పవన్ నటిస్తున్న భీమ్లా నాయక్ అప్ డేట్స్ ఎప్పటికప్పుడు తెలుస్తూనే ఉన్నాయి. ఆయన ఇంకా సెట్స్ పైకి తీసుకురాని హరీష్ శంకర్ సినిమా (భవదీయుడు భగత్ సింగ్) అప్ డేట్స్ కూడా అప్పుడప్పుడు బయటకొస్తున్నాయి. కానీ చాన్నాళ్ల కిందటే మొదలైన హరిహర వీరమల్లు సినిమా స్టేటస్ మాత్రం తెలియడం లేదు. ఎట్టకేలకు ఈ సినిమా అప్ డేట్స్ బయటపెట్టాడు దర్శకుడు క్రిష్.
కొండపొలం సినిమా ప్రమోషన్ లో భాగంగా మీడియా ముందుకొచ్చిన ఈ దర్శకుడు.. తన డైరక్షన్ లో పవన్ హీరోగా నటిస్తున్న హరిహర వీరమల్లు సినిమా జస్ట్ 25శాతం మాత్రమే పూర్తయిందని చెప్పుకొచ్చాడు. నవంబర్ రెండో వారం నుంచి కొత్త షెడ్యూల్ మొదలవుతుందని.. ఆ షెడ్యూల్ తో సినిమా ఫస్టాఫ్ (ఇంటర్వెల్ ఎపిసోడ్ తో సహా) పూర్తవుతుందని ప్రకటించాడు.
మార్చి 12 తర్వాత హరిహర వీరమల్లు సినిమా మళ్లీ సెట్స్ పైకి రాలేదని తెలిపిన క్రిష్.. ఆ మూవీ కోసం వేసిన సెట్స్ మాత్రం సిద్ధంగా ఉన్నాయన్నాడు. అయితే ప్రస్తుతం షూటింగ్ కు అనుమతులు ఉన్నప్పటికీ.. పవన్ బిజీ అయిపోయారన్నాడు.
ఈ నెలలో పవన్ కల్యాణ్ భీమ్లానాయక్ సినిమాను పూర్తిచేయాల్సి ఉంది. ఆ తర్వాత మాత్రమే ఆయన హరిహర వీరమల్లు సినిమా స్టార్ట్ చేస్తారు. కుదిరితే అదే టైమ్ లో, లేదంటే డిసెంబర్ నుంచి భవదీయుడు భగత్ సింగ్ సినిమా మొదలయ్యే అవకాశం ఉంది.