మెగా షెడ్యూల్ తో ముగింపు?

ప్రభాస్ హీరోగా నటిస్తున్న కల్కి సినిమాకు సంబంధించి ఆల్రెడీ ఫ్యాన్స్ సోషల్ మీడియాలో కౌంట్ డౌన్ స్టార్ట్ చేశారు. ఇటు చూస్తే షూటింగ్ మాత్రం ఇంకా పెండింగ్ లోనే ఉంది. మే 9న ఈ సినిమా విడుదల కావాలంటే ఓ భారీ షెడ్యూల్ చేయాల్సిందే.

ప్రస్తుతం అదే పనిలో ఉంది యూనిట్. ఈ నెల్లోనే కల్కి సినిమాకు సంబంధించి ఓ మెగా షెడ్యూల్ ప్లాన్ చేసింది. ఇది ఎంత పెద్ద షెడ్యూల్ అంటే.. టోటల్ యూనిట్ అంతా ఇందులో పాల్గొంటుంది. ప్రభాస్ తో పాటు దీపికా పదుకోన్, దిశా పటానీ, అమితాబ్, కమల్ హాసన్ ఇలా అందరూ ఈ షెడ్యూల్ లో జాయిన్ అవుతున్నారు.

కేవలం వీళ్లు మాత్రమే కాదు, గెస్ట్ రోల్స్ పోషిస్తున్న దుల్కర్ సల్మాన్, విజయ్ దేవరకొండ కూడా ఈ షెడ్యూల్ లోనే జాయిన్ అవ్వబోతున్నారు.

ఫిబ్రవరి 12 నుంచి ఈ భారీ షెడ్యూల్ ప్రారంభించి, ఏకథాటిగా 3 వారాల పాటు షూట్ చేయాలని కల్కి యూనిట్ నిర్ణయించింది. ఈ షెడ్యూల్ తో సినిమాకు సంబంధించి మేజర్ పార్ట్ షూటింగ్ పూర్తవుతుందట.

కల్కి సినిమా వాయిదా పడుతుందనే ప్రచారం కొన్ని రోజులుగా నడుస్తోంది. ఈ షెడ్యూల్ పై కల్కి విడుదల తేదీ ఆధారపడి ఉంటుంది. అనుకున్న టైమ్ కు అనుకున్నట్టు ఈ షెడ్యూల్ నడిస్తే, చెప్పిన తేదీకి కల్కి వస్తుంది.

2 భాగాలుగా రాబోతోంది కల్కి సినిమా. సైన్స్-ఫిక్షన్ కు మైథాలజీ జోడించి నాగ్ అశ్విన్ తెరకెక్కిస్తున్న ఈ సినిమాను వైజయంతీ మూవీస్ బ్యానర్ పై అశ్వనీదత్ నిర్మిస్తున్నారు.